SULOD lang sa duha ka mga buwan karong tuiga, niabot na sa 5,973 ka mga kaso sa dengue ang natala sa Central Visayas, 22 ang patay.
Kon itandi kini sa mga kaso sa unang duha ka mga buwan sa 2019, anaa kini sa 1.52 porsyento nga pagsaka.
Base sa datus sa Regional Epidemiology Surveillance Unit (RESU) 7, anaa sa 5,883 ka kaso ang natala sa susamang mga buwan sa 2019, 34 ang patay.
Sa nakalabayng semana, nipadayag na sa iyang kabalaka si Department of Health (DOH) 7 Regional Director Dr. Jaime Bernadas tungod sa taas nga mga kaso sa dengue sa rehiyon.
Ilang panglantaw nga minus ang mga kaso karong tuiga tungod kay nahuman na ang epidemic year niadtong 2019.
Tungod niini, niawhag pagbalik ang DOH 7 sa publiko nga bisan sa giatubang nga hagit sa coronavirus disease 2019 (COVID-19), di unta hikalimtan sa tanan ang kanunay nga pagpanglimpyo sa palibot aron di kapuy-an sa mga lamok nga nagdala og dengue virus. (HBL)