PNP chopper nahagsa; Gamboa luwas, 2 ka mga kauban kritikal

HUMAN masayod ang Police Regional Office 7 (PRO) 7 nga nahagsa ang gisakyang helicopter ni PNP Chief Archie Francisco Gamboa, dali nga nangadyi ang kapulisan sulod sa Saint Ignatius Chapel alang sa kaluwasan sa mga kauban sa ilang labaw sa Philippine National Police (PNP).

Matod ni PRO 7 chief Police Brigadier General Albert Ignatius Ferro nga naguol sila sa nadawat nga balita sa kaulohan labot sa nahitabo kang PNP Chief General Archie Gamboa.

Apan nahuwasan sila dihang gipahibawo nga luwas ra ang halos tanang mga sakay sa chopper human gidala sa labing duol nga tambalanan sa Laguna.

Ang laing duha ka police generals nga kauban ni Gamboa nga sakay sa helicopter nga nahagsa sa Laguna sa Huwebes sa buntag, Marso 5, naa sa kritikal nga kondisyon.

Sila si Major General Mariel Magaway, director for intelligence, ug Major General Jose Maria Victor Ramos, director for comptrollership, pabiling wa pa sa panimuot Huwebes sa udto, matod ni PNP deputy chief for administration Camilo Cascolan.

“Worried mi kay it’s our chief PNP. So, he’s our leader. We just had a command conference last Tuesday and it was a good mood. The President was giving praises sa PNP and suddenly this morning, we have this unfortunate accident,” matod ni Ferro.

Ang nahitabo kang Gamboa, matod ni Ferro, nahitabo usab kaniya sa dihang nagranggo pa siyag 2nd lieutenant sa Philippine Constabulary niadtong 1991.

Samtang nagsakay sila sa Huey helicopter sa Surigao Del Sur, kalit lang sila nga gipamusil sa mga sakop sa New People’s Army.

Ang helicopter naigo ug nagtuyok-tuyok na sa kahanginan.

Nagtuo sila nga mamatay na sa dihang nangabangga sila sa mga punoan sa lubi sa bukid.

Maayo na lang nga di kusog ang pagkahagsa ug silang tanan nga sakay apil ang duha ka mga piloto luwas. (AYB, SunStar Philippines)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph