Mga tambal mobaratog 58%

MAAYONG balita alang sa mga aduna’y gi-maintain nga tambal, tungod kay sugod Mayo ning tuiga, moubos ngadto sa 58% ang mga presyo sa mga medisina alang sa hypertension, diabetes, heart disease, chronic lung diseases, ug major cancer.

Kini human gipirmahan ni Presidente Rodrigo Duterte ang Executive Order 104 o ang Maximun Drug Retail Price sa 87 ka mga tambal nga kasamtangan nga mahal.

Nalakip usab sa MDRP ang mahal nga treatment sa prematurity, chronic renal disease, psoriasis, ug rheumatoid arthritis.

Sa maong EO, aduna’y lista sa retail price nga gipahamtang sa gobyerno.

Sa kinatibuk-an, 87 kini ka mga tambal ug moabot sa 133 ka formulations o kining dosage o strength/form.

Matod ni Lourdes Maratas, pharmacist III sa Department of Health (DOH) 7, nga Mayo 18 kini hingpit nga moepekto.

Kini 90 ka adlaw human mapirmahi ang EO bisan kon wa pay Implementing Rules and Regulations ang balaod, apan ipatuman dayon kini.

Sagad sa mga tambal mga generic, apan lakip ang branded nga adunay susamang formula nga mosubay sa balaod.

Dugang ni Maratas nga kinahanglan nga sugod sa Mayo, magbutang og poster ang mga botika nga maninda sa maong klase sa tambal ug ibutang ang bag-ong presyo.

Nalakip sa EO ang lista sa mga tambal diin anaa ang Maximum Wholesale Price (MWP) ug ang Maximum Retail Price (MRP).

Giklaro usab ni Lourdes nga kining MDRP, mamahimo usab sa special discounts susama sa senior citizens ug persons with disability.

Katambayayong sa DOH ang Department of Trade and Industry ug Food and Drug Administration sa pag-monitor unya sa presyo niini ingon man ang pag-inspect sa mga botika, pribado man o publiko kon nituman kini sa maong EO.

Base sa November 2019 nga resulta sa Ulat ng Bayan Survey nga gihimo sa Pulse Asia, 99% sa Pinoy di mopalit sa tanan niini nga giresita nga tambal tungod sa kamahal niini.

Samtang anaa lang sa 71% sa mga Pinoy ang mogasto og P1,000 alang sa binuwan nga supply sa tambal ug 24% ang andam mogasto alang sa P5,000 nga gasto sa binuwan nga tambal.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph