BANSALAN, Davao del Sur -- Hihay-hinay na og balik ang mga konsumante nga mamalit og karneng baboy human namingaw sa milabayb nga mga semana tungod sa isyu sa African Swine Fever (ASF).
Usa ang konsumanteng si Lisa Antipaso, 45, nga namalit og karne sa merkado publiko Huwebes sa buntag, Marso 5, sanglit magsaulog sa adlaw’ng natawhan ang apo niini.
Matud niya nga misalig siya nga luwas sa ASF ang lugar human gipatuman sa lokal nga gobyerno ang hugot nga seguridad aron di makasud ang mga baboy kon way sertipikasyon asa nagagikan.
Namalit na sab og karneng baboy si Lourdes Grijaldo, 51, human nga alang niya usa ka buwan silang nag-antus sa pagkaon og isda ug manok tungod kay nabalaka sa ASF.
Sa Magsaysay, mas gihugtan pa sa mga awtoridad ang pagbantay batok sa ASF pinaagi sa pagbutang og quarantine checkpoint sa entradang bahin sa lugar.
Bisan ang lungsod sa Kiblawan, padayon nga nagbutang og daghang checkpoint aron di malutsan sa mga baboy nga gikan sa mga lugar diin nag-positibo sa ASF.
Nanghinaut sab ang mga nagbuhi og mga baboy nga hingpit nang mahanaw ang ASF aron makabalik na sa ilang panginabuhian.
Unang nagpahimangno ang Department of Agriculture-Davao Region nga di una magbuhi og mga baboy sanglit mahimong masayang lang ang ilang kapital tungod sa ASF. (Orlando B. Dinoy)