HUMAN wa maapakita og aksiyon sulod sa 58 kaduwa, hingpit ug mahinayon na gyud nga makaduwa na og balik si Stephen Curry sa Golden State Warriors sa nagpadayong season sa NBA.
Kini maoy gipahibawo sa team kagahapon nga ang All-Star guard kinsa nakaangkon og bali sa iyang kamot batok sa Phoenix Suns sa niaging Oktobre 30, hingpit na nga naalim ug gitugotan nga makaduwa batok sa Toronto Raptors karong adlawa.
Pipila ang ka gutlo gikan sa pag-anunsiyo sa team, si Curry misunod gilayon pagpost sa iyang Twitter nga nagselebrar sa iyang pagbalik.
“About time!!!” nagkanayon ang two-time MVP.
Si Curry kinsa mag-32 anyos na karong Marso 14, moduwa na unta niadtong Dominggo batok sa Washington, apan wala lang gyud una dali-dalia sa team ang iyang pagkaalim.
Siya nag-average og 20.3 pointis, 6.5 assists ug 5.0 rebounds sa iyang upat ka duwa sa karon nga season.
Ang paghibalik usab ni Curry gikan sa iyang pagka-injury maoy unang higayon nga iyang ikauban si Andrew Wiggins kinsa nakuha sa Warriors gikan sa Minnesota niadtong Pebrero 6 baylo ni D’Angelo Russel, Jacob Evans ug Omari Spellman.
“I’m very excited. I feel like everybody is,” matod ni Wiggins. “He’s the type of player that singlehandedly he’s going to come and change the way everyone plays for the better. So, I’m excited. He’s a game-changer.”
Si Wiggins nag-average og 20.1 points sa iyang unang siyam ka duwa sa Warriors.
Hinuon, nahukman na sa Golden State nga dili na paduwaon sa tibuok season ang Splash Brother ni Curry nga si Klay Thompson kinsa padayon nga nagpaalim sa injury sa wala nga tuhod nga iyang naangkon sa Game 6 sa finals sa niaging Hunyo 13 batok sa Toronto Raptors.
Kon kahinumdoman, ang Warriors gihamok og mga injuries ug ingon man ang pagkawagtang sa ilang star nga si Kevin Durant ug ubang mga sinaligan pinaagi sa trade, ingon man pipila ang nangretiro na.
Sa kasamtangan, sila ang nangiwit sa overall standing nga may 14-48 nga baraha. (JBM)