MAINGON nga dalaga na usab si Gilda Galang Najam sa panuigon nga kalim-an ug lima. Inahan siya sa tulo ka anak, usa ang lalake ug duha ang babaye. Ang mga babaye naminyo na ug naghatag kaniyag kapin sa napulo ka apo. Maskin lagom ang pamanit niya, bigot gihapon ang iyang lawas, pinaulpot ang sampot niini, seksi ug batan-on gihapon tan-awon. Way kunot ang iyang mga aping, hamis ug nagsinaw sa diyutayng kaanyag.
Biyuda na si Gilda. Natigbak ang palahubog niyang bana nga si Albert nga
Katsilaon, tisoy ug tistisan. Pinangga siya sa iyang bana ug magtawganay silag “Ga.” Kapin sa lima ka tuig ang pagkamaguwang sa iyamng bana.
Matagbaw ang iyang bana kaniya kay hilabihan niyang maka-romansa. Mao nga mayabag ang iyang bana diha kaniya, higal, apan nagmingaw ang ilang romansa kay giatake sa diyabetes ang iyang bana nga hingaon og humba ug motungab og lima ka lapad sa ilimnong makahubog. Modailos na lang ang iyang bana kon mopatong ug mopaibabaw sa iyang paboritong unlan. Sanglit gimahal niya ang iyang bana, iya gihapon kining romansahon, kupugan nga walay utnga-utnga. May mga higayon nga hidlawon siya, apan iya na lang kining giluom sa hilom.
Dihang nagduawan na lang siya sa lubnganan sa iyang bana, ang kahidlaw sa unod mogimok sa iyang panglawas. Nagpangita na siyag kapares sa kinabuhi. Kaysa mahidangat sa purdoy nga mga tiguwang, midangop siya sa kalibutan sa internet. Gikahibalag niya ang lainlaing mga langyaw sa Amerika, sa Inglatiera, sa Alemanya, ug sa Australiya. Sa sinugdanan, nakakaplag siyag mga langyawng biyudo nga anaa na sa pauigon nga kan-uman ka tuig.
Sa iyang nahigala ug nasuod, may miduaw sa ilang pinuy-anan ug nakiglulinghayaw sa mga nindot nga mga dapit sa Pilipinas. Way supak ang iyang mga anak ug mga apo kay nabuhong man sila sa kinitaan sa mga langyaw. Ug labaw sa tanan, nakatilaw pod si Gilda og lainlaing mga putahe nga may lainlaing mga kumbati sa higdaanan nga iyang matagamtaman.
Apan naguol kaayo si Gilda nga walay miagda kaniya sa pagpakasal ug kutob ra diha sa kumbati sa higdaanan. Nakahukom siya nga moundang na lang sa iyang pagbiga-biga sa lainlaing mga lalake.
Apan wala niya damha nga ang unang langyaw nga miangkon sa iyang pagka babaye nahiduaw pagbalik sa ilang panimalay sa Sugbo.
Miluhod ang Australiyano sa iyang atubangan ug may gipakitang gamayng kahon nga may singsing nga diyamante. Miingon kini kaniya, “Will you marry me?” Nakigminyo si Gilda sa maong lalake ug nagpuyo na siya didto sa Australiya. Apan nangutana siya kon nganong gibalikan man siya sa iyang nahimong bana.
“You want to know the reason?” nagpahiyom ang iyang bana nga Australiyano samtang naghigda sila sa ilang mahunol-hunol nga higdaanan. “You are unique. You are amazing. I was shocked in the beginning. You were a ferocious lion and you growl with madness in sex. You were and you are so great and so fantastic in making love!”
Nahikatawa si Gilda ug iya dayon nga gikupogan ang iyang bana nga nagpusnga-pusnga sa kalalim.
(Katapusan)