NIINING nagkaduol na ang summer season mosantop gilayon sa atong tagsa-tagsa ka mga hunahuna ang pagbakasyon ug kay summer man sagad nga dagsaon ang kadagatan.
Nangita ka ba og dapit nga kasuroyan sa lalawigan sa Sugbo nga maghatag og katabagwan sa kanindot sa marine life, diin mangangha ka sa marine sanctuary gumikan sa katahom sa kinaiyahan ug tapok sa mga isda diha ilawom sa dagat.
Hilig ka ba og snorkelling og makita ang bagang tapok sa isdang sardines o ang makalingaw nga pagsunod-sunod sa mga dolphin sa pumpboat nga inyong luwanan.
Dili na kinahanglan modayo sa layo nga lugar aron inyong kining masud-ong kay ang lungsod sa Moalboal adunay tinagoan hiyas.
Unsaon pag-adto?
Sa mga nanukad sa dakbayan sa Sugbo sakay og bus sa South Bus Terminal paingon sa lungsod sa Moalboal sa gibana-banang pletehan nga P120 sa non-aircon bus o P130 sa aircon units.
Magsilbing landmark ang Moalboal Public Market diin maoy inyong naugan dayon sakay og motorsiklo paingon sa Basdako beach sa pletehan nga moabot sa P30 – P50 matag pasahero.
Moalboal
Ang maong lungsod nahimutang sa habagatang bahin sa probinsiya sa Sugbo nga ilado sa iyang kadagatanan.
Nahimutang sa maong dapit ang Basdiot fish sanctuary nga adunay gilapdon nga 4.17 hectares.
Mosugat sa inyong panan-aw ang nagkadaiyang marine life sa imong pag-snorkelling sama nalang sa mga pawikan.
Garbo sa Moalboal ang Sardines Run, unsay naa dinhi? Tapok sa minilyon na Sardines, kon hinan-aw mo og National Geographic nagpasabot ang maong linihokan sa maong matang sa isda, usa ka paagi aron paghadla sa ubang dagkong isda o predators nga mo-atake kanila.
Mamahimo sab kamo molawig sa Pescador Island sa maong lugar og sa maong dapit makadayeg ka sa kaanyag sa kinaiyahan.
Ang maong isla nailhan malambuon nga marine biodiversity, diin ubay-ubay sa mga matang sa isda ang nagtapok sa isla sa Pescador.
Igo nga nakatugsaw mi sa dagat aron sugdan na ang pagsawom-sawom mga isdang Molmol ug Mamsa ang mosugat sa imong panan-aw.
Human sa inyong pagtagbaw-tagbaw sa dagat ug sa higayon sa inyong pagbalik paingon sa hunasan akong sugyot nga mosubay ang inyong sakayan sa Tañon Strait ug dinhing dapita malingaw mo og sud-ong sa mga dolphins nga mosabay sa inyong pumpboat.
Angayang hinumdoman
Sa tanang lakaw mas bintaha nga inyong planohon sama nalangsa among pag-adto sa Moalboal aduna na kamiy (barkada) gi-contact nga pumpboat nga kaabangan alang sa island hopping sa kantidad nga P1,500.
Akong sugyot aron inyong matagamtaman ang dili makalimtan nga experience mao ang pagsawom o snorkelling diin mamahimong buhing saksi ka sa kanindot sa gasa gikan sa Kahitas-an.
Room Accommodation
Mas bintaha kon mag-overnight stay sa dili pa mobalik sa siyudad kay ako nakasiguro sa kakapoy gikan sa tibuok adlaw ninyong suroy-suroy.
Sa kantidad nga P700 ngadto sa P1,500 maka-avail namo og kuwarto nga nahimutang sa Basdako beach.
Pahibalo ginadili na ang pag setup ug camps sa Basdako Beach kini gumikan sa ka irresponsable sa mga bakasyonista nga magbilin sa ilang basura.
Aron nga magpabilin ang kaanyag sa kinaiyahan ug padayong ma-enjoy ang lugar atong tahuron ang lagda nga gipatuman sa tagdumala sa maong area.
Tana, suroyon ta ang Moalboal!