NA-ANAD na kita niining sa-ad sa pulitiko nga dili matuman. Nakahinumdum ko nga sa kandidata pa si Cory Aquino pagka-presidente batok kang incumbent president Ferdinand Marcos, iyang gisaway ang grabeng sugal sa casino ug jueteng. Iyang gisaad nga kon mapili siya iyang pahunongon ang tanang matang sa sugal. Apan sa iyang paglingkud sa Malacañang, mas migrabe man hinuon ang casino ug jueteng. Hapit tanang presidente misaad nga hunongon ang grabeng pagpangutang sa World Bank ug ubang mga banko apan migrabe man kini sa dihang sila nay namunoan. Ang atong mga pulitiko kusog kaayong mosaway sa pork barrel, apan anaa man gihapon kini karon.
Sa Sugbo, gisaway pag-ayo nila ni kanhi bise mayor Edgardo Labella ug sa oposisyon si kanhi mayor Tomas Osmena sa pagtukod niini sa Barangay Mayor’s Office (BMO). Apan nakurat kita nga nagtukod man sila og Mayor’s Information and Liaison Office (MILO). Lahi kuno kini sa BMO kay dili man sila manghilabut sa gimbuhaton sa barangay kapitan. Apan kon ang tumong ug tuyo sa City Hall mao ang pagtudlo og information ug liaison officer, ang mga barangay kapitan unta ang tahasan sa pag-ila sa maong mga tawo. Bisan unsaon nila pagdepensa sa Milo, dili malikayan ang pagduda nga political accommodation kini sa mga dumadapig ni Mayor Labella. Tinuod ba gud nga way pagpinig si Labella pagtratar sa mga barangay bisan unsay bulok sa pulitika sa barangay kapitan? Ngano man diay og angkunon na lang nila nga pamulitika kini total gipaabut man sa katawhan nga kon mag-ilis na og hari sa city hall, iyang mga dumadapig na usab ang mga sundawo. Nahigmata na tingali ang mayor o kaha nakumbinsir na siya sa iyang mga lider nga dili siya mahimong magpatunga ug mangiyugpos lang niining bugno sa pulitika. Kinahanglang lig-unon gayud niya ang iyang partido kon buot pa niyang magpadayon paglingkud diha sa Cebu City hall.
•••
Murag maklaro na ang badlis sa pulitika dinhi sa dakbayan sa Sugbo. Kini human gitangtang si kanhi barangay kapitan Lemar Alcover isip chairman sa Cebu City Mining and Regulatory Board (CCMRB). Si Lemar anak ni kanhi Cebu City councilor Pastor Alcover, Jr. nga bag-o lang nakabangga si City Administrator Floro Casas, Jr. Gikiha ni Casas si Alcover, Jr. og 31 counts sa cyberlibel ug grave threats. Sumala sa kasaligang tinubdan sa Superbalita nga ang hinungdan sa pagtangtang kang Alcover mao ang pasangil nga mopahigayon sila og checkpoint ug manakop sa mga hauler bisan kon dili kuno siya deputized ug accredited sa Mines and Geosciences Bureau (MGB). Nasuko si Lemar kay murag gipasanginlan siyang nangilkil.
Natural, kini si Lemar ug ang iyang amahan mobiya na kang Labella ug adto na sa kiliran ni Bise Mayor Mike Rama. Si Pastor dili man suod sa padrino ni Mayor Labella nga si Presidential Assistant for the Visayas Mike Dino. Dili ko mahibung kon hukasan si Pastor ug tanan niyang alalay sa tanan nilang mga posisyon nga hinatag sa mayor. (mannyrabacal1144@gmail.com)