Barrita: Chinese invasion gisugdan?

ANGAY magbantay kadtong nagpasiaw nga hayan mahimong probinsiya sa China ang Pilipinas. Dunay warning si Senador Richard Gordon sa usa ka “creeping invasion” sa China pinaagi sa Philippine offshore gaming operators (Pogo) dinhi sa atong nasod.

Sa usa ka privilege speech sa Senado niadtong Martes, Marso 4, si Gordon miingon nga basi sa bana-bana sa Leechiu Property Consultant, aduna nay 470,000 ka mga Chinese nationals nga nagtrabaho sa mga Pogo dinhi sa Pilipinas.

Matod pa niya, mas taas kini sa bana-bana sa gobyerno nga kapin sa 100,000. Matod pa ni Gordon, hayan ang mga langyaw nga Insik maoy motake-over sa atong mga isla kay nikatap na sila sa Metro Manila, Davao, Olongapo ug Central Visayas.

•••

Si Gordon, chairman sa Senate blue ribbon committee, nangulo sa pakisusi sa pagdas-ag sa mga Chinese national ug sa pagtugot sa anti-money laundering authorites nga makalusot ang $447 milyones nga cash sa Ninoy Aquino International Airport (NAIA).

Daw nalumpag na ang atong mga border, matod niya, kay nakalusot ang maong kantidad sa cash dala sa mga Chinese ug Filipino couriers. Ang iyang imbestigasyon sa Senado niadtong Huwebes maoy pagseguro nga mokayab pa ang bandilang Pilipinhon.

Gitumbok nga hinungdan ni Gordon mao ang giingong multibillion-peso “pastillas” bribery scheme sud sa Bureau of Immigration (BI). Ubos sa “pastillas scheme” ang mga Chinese citizens nga nagtrabaho sa Pogo mobayad og P10,000 nga “service fee.”

•••

Gipaimbestigar usab ni Senador Panfilo “Ping” Lacson ang taho nga adunay mokabat sa 3,000 ka mga sakop sa People’s Liberation Army (PLA) nga anam-anam nga niabot sa Pilipinas ginamit ang pagtrabaho sa mga Pogo nga cover o pantalya.

Sa wa pa sulnga ug sakopa ang Pilipinas sa Japan sa Ikaduhang Gubat sa Kalibotan, ang mga residente sa syudad sa Sugbo niingon nga daghang mga batan-ong Hapones nagtrabaho sa mga panimalay sa mga adunahan isip hardinero ug kusinero.

Mga bag-ong gradwado diay kadto sila sa Japanese military academy. Ang sa China, tua sa mga Pogo. Sa one plus one pa, unsa kahay mahitabo karon nga duna pa silay pundo nga tunga sa bilyon dolyares nga di na igkita?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph