KATUOHAN dili, apan tuo na lang mo aron ta madali. Morag nunot sa climate change, daghan sab nga katingad-ang panghitabo sa atong palibot.

May mga magtiayon nga nagbulag human sa usa ka adlaw nga kasal. Ingon pa sa libro nga akong nabasahan, niadtong 1800's adunay 1 ka dibursyo sa America matag 15 ka kasal. Sa panahon karon, may 1 ka dibursyo sa 2 ka kasal. Ambot kaha sa Pilipinas kun pila ang nagbulag kay wa may dibursyo dinhi.

Dunay nabalitaan nato nga menor de edad nagpakamatay kay gibulagan ug menor de edad sab nga uyab.

Dunay mga manoy nga nangitag bag-ong sakuban ug bisan di na gani makatindog, mokariring pa gihapon murag kasing karagan kung makakita ug seksing dalaga.

Uso sab ang padaghanay ug uyab pinaagi sa text. Daghan sab ang nga magtiayon nga nagdinumugay tungod lang sa cellphone. Niadtong miaging semana nagkita kami sa akong higala nga nagminghoy og di ma-drowing ang nawong.

Matud pa niya nga wa siya makatrabaho kay bantay-bata siya sa 2 niya ka gagmay'ng anak. Nagtaban daw ang iyang katabang nga may 2 na ka apo uban sa 23 anyos nga drayber sa habal-habal nga kauban ra sab sa iyang bana sa pag-spray og mangga ug pagpamaligya og uling.

Ikaduha na kini nga higayon nga nagtaban ang iyang katabang. Sa niaging duha ka tuig, gibiyaan sa iyang katabang ang iyang 7 ka anak ug bana nga pwera buyag sab ka palahubog og miuban sa ulitawong lalaki nga tag-iya daw og basakan sa Agusan.

Nagsugod ang mainitong gugma nilang lola sa panahon sa Misa de Gallo diin matag kaadlawon sunduon siya sa aktor aron manimba.

Nadani tingali sa maayong dila og sa mabugnaw'ng hinuyuhoy sa hangin mao nga nakahukom sila sa pag-uban sa hirap man at sa ligaya biniyaan ang ilang mga mahal sa kinabuhi.

Ingon pa sa akong higala nga wa gayod sila kadiparal sa binuhatan sa lola kay maayo man siya motrabaho og moatiman sa mga bata.

Natingala na lang sila nga sobra duha ka bulan nang mananghid si lola nga didto matulog sa iyang anak nga bag-o lang nanganak kay wa daw kauban sa balay. May nga tsismis sab nga nikatag nga nagdula kuno sa kalayo si lola kay sweet kaayo kining makighalog sa batan-on bisan kon nagkapangag na.

Gikumprontahi siya sa iyang silingan nga nakonsensya na tungod kay buoton ang iyang bana nga maoy nag-atiman sa duha pa nila ka gagmayng anak og uma apan nangulipas siya nga limpyo daw ang iyang konsensya.

Usa ka buntag, nananghid kini nga mouli una aron husayon ang tanan dala na ang iyang tanang gamit. Apan unsang unsaa nga nahanaw ra man hinuon silang duha nga gidudahang nagtaban padulong sa lugar sa batan-on didto sa Marilog.

Ingon pa sa iyang bana nga dimalas ra gyod kaayo ang iyang asawa nga nikuyog niadtong batan-on nga tapulan, hilabtanon og way kaligo.

Sa dihang nanglimpyo sila sa lawak sa lola may nakitang papel nga may sulat sa lola "I love you. Happy 3 months anniversary mahal."