COTABATO CITY -- Narekober sa militar ang kusog nga matang sa mga improvised explosive devices (IEDs) alas 4:30 sa hapon, Huwebes, Marso 5, sa probinsiya sa Maguindanao.
Gibutyag ni 601st Brigade Commander Colonel Jose Narciso nga nagpahigayon og combat clearing operation ang mga sakop sa 57th Infantry Battalion-Philippine Army sa utlanan nga bahin sa mga lungsod sa Ampatuan ug Datu Hoffer sa nahisgutang probinsiya sa dihang ilang nadiskubrehan ang himoanan og mga IEDs sa Bangsamoro Islamic Freedom Fighters (BIFF).
Gitago ang mga kusog nga matang sa IEDs sa payag sa lati nga bahin sa Barangay Salman, Ampatuan duol lamang sa Maguindano massacre site niadtong Nobyembre 23, 2009.
Mga IEDs gilangkuban sa duha ka jetmatic pump, high explosives, ammonium nitrate, mga lansang, pulbura ug uban pa nga kagamitan sa paggama og bomba.
Gitumbok sa Joint Task Force Central nga grupo ni Salahudin Hassan ang nanag-iya sa mga bomba.
Daghang mga IEDs na ang narekober sa militar sa gilusad nila nga focus military operation sa SPMS Box ug Liguasan Delta sa maong probinsiya.
Ang uban kanila narekober sab sa militar gikan sa mga nailog nilang kampo sa BIFF, kon diin timailhan lang nga dunay plano ang grupo nga pagpamomba. (Edgar E. Fuerzas)