MAGSAYSAY, Davao del Sur -- Nakasinati og pagsuka-suka, kalibanga ug kalintura ang ubang mga bakwit sa linog didto sa Barangay Balnate ug ang hugaw nga suplay sa tubig maoy gituohang hinungdan sa pagpanakit sa ilang tiyan.
Usa sa mga biktima mao si Eduardo Dalunan, kinsa mihiklin gikan sa Barangay Tagaytay human gideklarang "no man's land" na ang ilang lugar.
Ang biktima lima ka adlaw na nga naospital sa silingang lungsod sa Bansalan human nakasinati og pagsuka-suka ug kalibanga nga sagol dugo.
Ang bakwit nga si Joey Lugisan bag-o lang miguwa sa tambalanan apan nibalik na sab human ang iyang usa ka tuig nga babayeng anak mao na say nagsuka-kalibang.
Subay sa datos sa tambalanan, 43 na ang nadala gikan sa Barangay Tagaytay sukad Enero ning tuiga ug ang pinakadaghan niadtong Pebrero diin 34 ang nasulod sa tambalanan.
Usa sa mga gilantaw'ng hinungdan mao ang kuwang nga suplay sa tubig sa ilang evacuation center nga maoy nag-unang suliran sa mga biktima.
Nanawagan si Thelma Pandayan nga mahatagan sila og igong suplay sa tubig aron di sab sila maproblema kon unsay panglimpyo sa mga hugaw sa kasilyas ug palibot.
Sa kasamtangan, nagsalig ang mga bakwit sa ginahatud nga suplay sa Philippine Red Cross apan kung di sila mahatdan wa sab silay tubig nga magamit.
Sumala niini nga matag indibiduwal na ang nagadala og tubig sa ilang kasilyas mao nga kung kuwang ang tubig di malikayan nga di maayo ang pagkalimpyo niini.
Samtang gikompirma sa Municipal Health Office (MHO) nga aduna say nag-positibo sa sakit nga cholera hinungdan nga giawhag ang mga molupyo nga obserbahan ang "proper hygiene" sanglit usa ang hugaw sa tawo nga makahatag og sakit.
Gitataw ni Dr. Arthur Navidad, MHO officer, nga mihimo na sila og pamaagi sa pag-kontrola sa kagaw pinaagi sa pagbalhin sa ubang bakwit sa laing evacuation center aron maatiman ang sanistasyon. (Orlando B. Dinoy)