BISAN sa padayon nga monitoring sa African Swine Fever (ASF) Task force sa lalawigan sa Sugbo aron nga magpabilin nga ASF-free ang lalawigan, pito ka mga lungsod gihinganlan sa Provincial Veterinary Office (PVO) nga wa mosanong sa mando ni Gobernador Gwendolyn Garcia.
Kini may labot sa pag-umol og kaugalingon nga task force matag lokal nga kagamhanan ug pag-monitor sa mga lungsod aron masiguro nga luwas sa mga ginadili nga produkto ang lugar.
Nakalatid kini sa Executive Order 13 nga giluwatan ni Garcia sa Agusto 20, 2019. Nagmando kini sa mga LGU ubos sa Kapitolyo sa pag-umol og kaugalingon nga task force aron nga mas ma monitor ang mga baboyan ug mga produkto sa baboy subay sa padayon nga pagsaka sa risgo sa P11 bilyones nga hog industry sa lalawigan tungod sa hulga sa ASF.
Si Dr. Mary Rose Vincoy, Provincial Veterinarian ug pangu sa task force sa lalawigan, nagkanayon nga atol sa pakisusi sa Marso 4, 2020, sa 51 ka mga lungsod sa lalawigan, pito niini wa mosunod sa mando. Wa motuman mao ang Minglanilla, San Fernando, Borbon, San Francisco sa mga Isla sa Camotes, Alcantara, Ronda ug Dumanjug. Matod ni Vincoy nga isip panagang, gikinahanglan nga panalipdan sa matag lungsod ang ilang mga lugar tungod may gagmayng mga tindahan pa nga posible nga mobaligya sa gidili nga mga produkto.
“Kana ang atong prevention, dili na siya nagpasabot nga molihok ang LGU tungod kay naay daghan nga backyard raisers o baboyan. Even if you don’t have piggery farms, kinahanglan gihapon nga mohimo ta sa atong mga preventive measures ilabi na ang pag check sa mga sari-sari stores kanang mga meat shops kung asa gikan ang karne”, matod ni Vincoy sa Superbalita Cebu sa Marso 5, 2020. (ANV)