Pusil giduwaan; 2 ka mga bata napusilan, 1 kritikal

NAANGOL ang duha ka mga 7-anyos nga batang lalake, usa nila naa sa kritikal nga kahimtang, human nakablitan sa usa ka 5-anyos nga bata ang giduwaang pusil Biyernes sa alas 11 sa buntag, Marso 6, 2020 sa sityo Paulton, Barangay Banilad, Mandaue City.

Si Police Corporal Shem Saranillo, imbestigador sa kaso, niingon nga si Anna (di tinuod nga ngan), 5, nakakita sa pusil kilid sa nagtipun-og nga mga basura. Gihatag ni Anna ang pusil ngadto kang Kevin (dli sab tinuod nga ngalan), 5, ug gisugo niya nga pusilon ang iring.

Aksidenteng nakabalitan ni Kevin ang pusil hinungdan sa pagkaigo sa ulo ni Kian Caylaluad, 7, ug nilapos ang bala.

Ang bala nga nilapos nitapsing sa nawong ni Luke, 7, maguwang ni Anna.

Tungod sa kusog nga buto sa armas, naalarma ang mga silingan ug dito na nakita nga naghigda ug nagkadugo ang mga bata.

Usa ka concerned citizen nilabay sa armas luyo sa poste aron itago ang armas ug wala nay maigo ug maangol pa.

Daling nanawag ang mga residente og ambulansya, apan dugay pang naabot hinungdan nga gisakay sa motorsiklo ang mga bata ug gidala sa North General Hospital sa Barangay San Jose, Dakbayan sa Sugbo. Si Luke gibalhin sa Cebu Doctor’s Hospital aron operahan.

Dihang nahinabi sa Superbalita Cebu si Kian, matod niya nga siya nagtuo nga duwaan ang armas.

Niaksyon ni og pusil samtang niingon og “pew pew pew.”

Giingnan pa niya si Luke nga modagan tungod kay anaa kini bala nga sirkol ug gitubag siya nga way bala.

“Dayon naigo man si (Luke), nikalit lang og kalamba. Pagmata nako, kusog kaayo ang buto,” sigon ni Kian.

Sigon ni Kevin nga daan na nga giinggan ang pusil.

Gatuo sab siya nga ang pusil nga gihatag ni Anna duwaan, apan niangkon kini nga bug-at.

Sigon ni Saranillo, imbestigador, nga ang armas giinggansa nang daan.

Dugang ni Saranillo nga human sa hitabo, ilang nakita nga adunay trauma sa mga bata. Tungod niini, si Anna kinsa witness sa insidente, di na kaayo makig-estorya.

Samtang si Kevin, human sa aksidente, nagdagandagan, apan gituohang aduna sab kini trauma tungod sa kusog nga buto. Nakita sa crime scene ang usa ka empty shell ug 9mm pistol nga adunay walo ka mga bala.

Kasamtangang, gipangita sa kapulisan ang tag-iya sa armas pinaagi sa pagtan-aw sa serial number niini.

Sigon sa istorya sa mga residente sa dapit nga ang maong pusil pagpanghadlok sa mga mangawat og manok igtatari nga naa ra sab hawanan duol kon asa nakita ang maong armas. Anaa pa gihapon sa kritikal nga kondisyon si Luke sa pagsuwat ning taho.

Gikinahanglan pa kini nga operahan.

Samtang si Kian nakauli ra dayon sa ilaha ug pa-injectionan og anti-tetanus.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph