MADUNGOG sa katigulangan ang panultihon nga maliso pay buko sa kawayan, maputi nalang ang uwak o mausab nalang ang taghoy sa siloy. Ingon niini ang lag-it nga baruganan ni Pres. Rodrigo Duterte sa dili pagbag-o sa legislative franchise sa ABS-CBN Corporation ug subsidiary ABS-CBN Convergence, Inc. nga mapopos sa Marso 30, 2020. Apan bisan hugot ang iyang baruganan dili makapakgang sa kongreso nga dunay katungod sa renewal. Igo ra si Duterte sa pagpirma o dili sa balaod nga mapasar. Sa sayo pa nasuko si Duterte sa ABS-CBN sa wala pagpagula sa iyang campaign ads sa 2016 presidential elections bisan nakabayad na kay tua makapusta sa LP ni Mar Roxas. Gidawat ang pasaylo apan wala pasayloa ang kasaypanan.
Pebrero 10, 2020 Sol-Gen Jose Calida misang-at og quo warranto petition ngadto sa Supreme Court batok ABS-CBN nga ipakawaly bili o rebokahon ang prangkisa usa ka special civil action sa ngalan sa nasod batok sa mga kalapasan sa balaod. Sama sa pag-abuso nga nakapabulahan sa pipila ka mapahimuslanon gasto sa minilyon ka mga subscrivers, binayran nga pag-broadcast nga nakalapas sa mga lagda nga gisitar sa kongreso sa 1995, mitugot sa langyawng investors nga kalapasan sa konstitusyon, pag-abuso sa pribilihiyo nga gihatag sa estado paglusad sa pay-per-view Channel TV Plus nga mao ang KBO nga walay permiso sa NTC. Gisundan sa mosyon nga luwatan ang gag order. Ang maong quo warranto midangop sa doktrina Salum Est Suprema o The Welfare of the People is the Supreme Law. Kahinomdoman si Chief Justice Lourdes Sereno napalagpot pinaagi sa quo warranto petition ni Calida.
Macabayan bloc sa gitipon nga House Bill (HB) 6052 miila sa epikto sa pagsira nga nakalapas sa kagawasan sa prensa ug demokrasya, mawagtangan sa trabaho ang 6,730 ka mga regular, 900 non-regular ug 3,325 talents. Ang maong balaodnon nga nagtinguha sa pag-renew sa franchise maoy sumpay sa HB 4349 ni Rep. Micaela Viologo nga iyang gisubli pagsang-at sa HB 676. Buhay Rep. Lito Atienza mipiit sa ubos balay-balaoranan nga lihokon ang renewal ilabina ni Rep. Franz Alvarez sa committee on legislative franchises lakip sa maong awhag si House Speaker Allan Peter Cayetano. Gidungog sab sa senado sa komitiba ni Sen. Grace Poe sa public services. Danag nga pamahayag sa napriso Sen. Leila de Lima nga ang ABS-CBN hulipan ni Duterte sa iyang mga chronies o China-backed entities. Ubang mga kaatbang sa politika ni Duterte nangugat nga ipa-bag-o ang prangkisa. Apan subling mibarog si Duterte nga kritikal sa iyang pamunoan ang ABS-CBN lakip na ang Philippine Daily Inquirer ug Raffler. (csa_1156@yahoo.com / 09064648954)