HEPE sa Argao Police Station gidakop sa Integrity Monitoring and Enforcement Group Visayas Field Unit (Imeg), Regional Investigation and Detective Management Division (RIDMD) ug Regional Intelligence Division (RID) 7 human maaktohi nga nakigdulog sa babayeng piniriso sulod sa iyang lawak sa police station.
Tungod niini, dako ang posibilidad nga mahulipan ang mga personnel sa Argao Police Station gawas lang sa duha nga maoy ningbutyag sa gihimo sa ilang hepe nga si Police Major Ildefonso Miranda Jr. sa duha ka babaying binilanggo, usa iyang gikadulog sa kama sa iyang lawak. Si Miranda gipulihan na sa Biyernes, Marso 6, 2020 ni Police Captain Elston Dabon III.
Gimandoan ni Police Brigadier General Albert Ignatius Ferro, hepe sa Police Regional Office 7, ang RIDMD pagpaubos sa imbestigasyon sa tanang pulis sa lungsod sa Argao.
Nganong nabunggo
Marso 4, 2020, usa ka konsehal sa lungsod sa Argao, uban sa duha ka pulis sa Argao, nakigtagbo sa Imeg Visayas Field Unit, diin ilang gitug-an si Miranda.
Ilang gibutyag nga usa ka binilanggo nga babaye nga adunay kaso sa section 5 ug 11 sa Republic Act 9165 kun Comprehensive Dangerous Drugs Act 2002, naa kanunay sa lawak.
Ang babaye mao si Jean Claudia de Guzman Villanueva, taga lungsod sa Dalaguete, apan nadakpan sa usa ka buy-bust sa Barangay Langtad, Argao, niadtong Agusto sa miaging tuig.
Ni-surveillance gilayon ang Imeg personnel pinaagi sa pag video ug pagkuha og hulagway ni Miranda ug si Villanueva nga gihulagway ni Ferro nga maanyag.
Human masuta nga tinuod ang pangangkon sa mga saksi, gihimo dayon ang operation alas 11:20 sa gabii niadtong Huwebes, Marso 5 sa sulod mismo sa iyang lawak sa quarter nga naabtan nila nga naghigda sa katre ni Miranda si Villanueva.
Lakip sa ilang naabtan si Brenda Caminero Cutillar, 40, kinsa nag-atubang usab og kasong sa illegal drugs.
Sa nakuha nga impormasyon ni Ferro, adunay relasyon ang duha tungod kay ubanon kini ni Miranda sa iyang mga suroy-suroy sa mga resort sa probinsya ug Dakbayan sa Sugbo.
“Allegedly she was being brought here in Cebu City naga date pa sila. It’s really a very breach of discipline to a police officer,” matod ni Ferro.
Usa ka tinubdan nga di gustong nganlan niingon nga ang relasyon nila ni Miranda ug Villanueva nagsugod niadtong Nobiyembre sa miaging tuig.
Si Villanueva nasilutan og usa ka tuig ug siyam ka buwan nga pagkabilanggo, apan nisud og plea bargaining.
Tungod niini, nimando si Regional Trial Court (RTC) Branch 26 presiding Judge Francis Rainier Navarrete sa pagpa-rehabilitate kang Villanueva. Apan wa kini tumana ni Miranda.
Matod sa tinubdan nga wa magpakabana ang mga sakop ni Miranda sa iyang gibuhat kay maayo kini og relasyon sa iyang mga sakop.
Silot
Tungod sa gihimo ni Miranda, mag-atubang siya og mga kasong administratiba nga mao ang serious grave misconduct.
Lakip sa iyang atubangon ang kasong kriminal nga kalapasan sa Republic Act 3019 kun Anti-Graft and Corrupt Practices Act ug kalapasan sa Article 210 kun direct bribery ug Article 156 kun delivery of prisoners from jail sa Revised Penal Code.
Gipasabot ni Ferro nga ang pag butang lang sa binilango sulod sa iyang lawak dako na nga kalapasan sa balaod.
“He is seriously taking advantage of the status of the arrested person, even those being detained. They should be accorded due respect. So, when we learned about it, I asked Imeg and our intel to really push for the entrapment operation,” dugang ni Ferro.
Ang pagkasikop ni Miranda kabahin sa ilang internal cleansing.
Si Police Colonel Roderick Mariano, hepe sa Cebu Police Provincial Office (CPPO) nasagmuyo sa hitabo.
Matod ni Mariano nga nakurat siya ug nasagmuyo sa gihimo ni Miranda.
“Despite na he is a former human rights officer ng province na alam nyang bawal yan, alam nyang hindi dapat yan,” matod ni Mariano.