INIGSIAK sa banagbanag sa kaadlawon
Ang mga ulipon sa buhat magtagay
Init nga kape nga kuwang og kamay
Daw alak mokuyanap sa dughan
Batok sa katugnaw sa kabuntagon.
Ang mananagat magpalawod
Magbugsay sa iyang baruto
Tiunay nga kaabag sa kinabuhi
Dili maluibon sa wagas nga pagbati
Mosungasong sa unos sa kinabuhi.
Dinhi sa iyang uma ang magbabaol
Dili manumbaling pagtrapo aron mouga
Ang nagbukal nga mga singot sa agtang
Padayong nagbugwal sa tabunok nga yuta
Nag-ugmad sa kaugmaon sa iyang mga bata.
Sa pantalan naligo sa iyang mga singot
Ang kargador wa moangka sa kabug-at
Sa sakong binandahan sa iyang abaga.
Sa kalig-on niini nagsalig iyang pamilya
Nga may ikahungit sa baba ning adlawa.
Inigsiak sa banagbanag sa kaadlawon
Ang mga ulipon sa buhat manikaysikay
Padayong mobaktas sa dalan sa panahon,
Sa ilang kapalaran tagsa-tagsang mosubay
Sa bagad sa kinabuhi motubay kanunay.