Drayber nabuthan og pusil?

USA ka drayber ang nadala sa ospital human aksidenteng nabuthan og pusil sa usa ka sekyu didto sa Barangay Magdum, dakbayan sa Tagum.

Giila ang biktima nga mao si Jeffrey Renza, ug hamtung ang panuigon.

Sa report nga nakuha gikan sa Tagum City Police Station nasayran nga pasado alas 10:00 sa buntag niadtong Biyernes, nahitabo ang insidente.

Sumala pa nga gisandig sa guwardya sa Phoenix Gasoline Station nga si Junnel Duque ang iyang shotgun sa usa ka lamesa samtang nagsulat sa iyang logbook.

Kalit nga miduol ang biktima ug gikabay-an ang pusil ni Duque hinungdan nga aksidente kining mibuto.

Naigo ang biktima sa iyang bitiis kinsa dali sab nga gitabang ug gidala padung sa Bishop Joseph Reagan Hospital.

Apan sa gihimong pakisusi sa mga otoridad, gipasangil sa biktima nga gipusil siya sa sekyu hinungdan nga naigo siya.

Hinuon ang pasangil gipanghimakak sa sekyu.

Dason sa sekyu nga wala niya gipusil ang biktima, gihilabtan lamang gyud niini ang iyang armas mao nga mibuto.

Dugang imbestigasyon gilusad sa kapulisan karon. (Marvin Pineda)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph