POLITIKA ang gidudahang motibo sa pagpusil sa duha ka wala mailhing mga lalaki sa usa barangay kapitan nga dumadapig sa mga Duterte niadtong Sabado.

Ang insidente nahitabo sa alas 12:30 sa hapon sa Lanang Road, Lanang Executive Homes Subdivision, Barangay Rafael Castillo, siyudad sa Davao.

Si Kapitan Glenn Escovilla, 48, minyo, nagpuyo sa # 123 Paramount Street, Lanang Executive Homes swerte nga nakalingkawas sa kamatayon kay wala mibuto ang armas

nga gigamit sa buot mopatay kaniya.

"Wala koy nakita nga laing motibo gawas sa politika kay solid nga supporter sa mga Duterte. Wala may tawo nga nasilo nako sa bukid. Layo ang kamatuoran nga mga rebeldeng New People's Army (NPA) ang mopatay nako," ni Escovilla, barangay captain karon sa Barangay Megacawayan, distrito sa Calinan dihang nahinabi sa Superbalita niadtong Sabado.

Si Escovilla nagbutyag nga gikan siya sa ilang balay uban iyang asawa ug tulo ka mga anak lulan sa iyang gimaneho nga Toyota Fortuner (plate number LG-397) apan dihang miabot sila sa kanto Lanang Road dunay mitupad nga duha ka mga tawo nga nagsakay og motorsiklo.

"Ang backrider maoy mipusil nako pero wala mibuto ang iyang pusil. Nataranta sila mao nga wala na nakapabuto ang suspect," saysay ni Escovilla kinsa midangop sa San Pedro Police Station.

Si Escovilla nagsulti nga gipasidan-an siya sa iyang igsuon niadtong miaging semana nga magbantay gumikan kay dunay mga tawo nga nagsunod-sunod kaniya.

"Human niadtong dunay mga kapitan nga gipanghulga sa text, gitext ko sa akong igsuon nga magbantay," dugang pahayag ni Escovilla nga naghangyo kung mahimo hatagan siya og pagtugot nga makadala og armas sa Comelec.

Nag-imbestiga na karon ang kapulisan sa maong insidente aron mailhan ang mga tawo nga nagtinguha sa kinabuhi sa maong kapitan.

Si Bise Mayor Sara Duterte human nasayud sa maong hitabo nagpasidaan sa iyang kaatbang sa politika nga sila House Speaker Prospero Nograles ug Karlo Nograles nga dili hilabtan ang ilang mga lider.

"Kung inyong hilabtan ang among mga supporters basin mag-redo ta dinhi sa Davao," pahayag sa bise mayor atol sa programang "Gikan sa Masa, Para sa Masa" sa ABS-CBN kagahapon sa buntag. (AD)