DUHA ka managlahing kaso sa pagpangluba ang natigayon niadtong Sabado ning siyudad sa Cagayan de Oro.

Unang biktima mao si Geoff Cabaraban, 34, taga Punta Macabalan ning siyudad ang giluba sa suspek nga nailang si Jonard Perales, 34, sa susamang dapit.

Ang kapolisan sa Police Station 5 (PS5) sa Macabalan nibutyag sa Sun.Star Superbalita nga natripan lamang ang biktima samtang kini nagbaklay ug deretso nga giluba.

Dako nga samad sa tiyan ang naangkon ni Cabaraban gamit ang kutsilyo.

Nasayran nga unang nakasibat ang suspetsado ug wala masapon sa kapolisan dihang giresponde.

Apan niadtong Sabado sa gabii, adunay nakatudlo sa gitagoan niini hinungdan sa pagkasikop ug pagtingkagol ni Perales sa prisuhan ning panahona.

Nagpabilin pa nga giatiman sa doktor sa Northern Mindanao Medical Center (NMMC) ang biktima.

Samtang laing biktima mao si Daryl Lonsal, 20, ulitawo, nagpuyo sa Manolo Fortich, Bukidnon.

Giluba ang biktima sa wala mailang suspetsado niadtong Sabado mga alas 8:00 sa gabii samtang nagbaklay.

Pauli na si Lonsal dihang giatangan sa usa ka lalaki, sa kahadlok sa biktima nga lubaon dihang namatikdan ang hinagiban, midagan si Lonsal apan gilakag sa suspek.

Nasapon si Lonsal ug deretso nga giluba hinungdan nga nakaangkon og tulo ka mga samad nilubaan ang biktima.

Gidala gihapon ang biktima sa NMMC ning siyudad. (SVB)