ATONG nahisgutan dinhi ang estado sa kamatayon. Atong nasayran nga ang kamatayon usa ka estado sa pagka-walay kinabuhi. Sa English, death is a state of lifelessness. Ang pangutana mao kini, nganong naa’y kamatayon?
Kung ang Biblia ang atong ipatubag, ang kamatayon niabot tungod sa pagpakasala (James 1: 15). Sa laktod nga pinulungan, walay kamatayon kung walay sala o pagpakasala. Ang sunod nga pangutana mao kini, nganong adunay sala o pagpakasala?
Ang sala mao ang paglapas sa kasugoan (1 John 3:4). Ang basihanan sa kinabuhi mao ang kasugoan sa Dios, ug ang paglapas niini mao’y giingon nga pagpakasala. Sa sayon pa nga pagsabot, ang kamatayon mao’y produkto sa atong desisyon sa paglapas sa kasugoan. Kung wala nato gilapas ang kasugoan, wala unta’y kamatayon nga naabot sa katawhan.
Kinsa ba ang responsable sa pagpakasala? Kinsa pud ang naghatud kanato sa pagpakasala?
Bisan pa nga si Satanas ang naghatud kanato niining sitwasyon sa pagpakasala, dili siya mao’y responsable sa atong matag desisyon. Kay kung atong sisihon si Satanas niining atong pagpakasala, kinsa ma’y naghatud kaniya sa iyang pagpakasala? Basin basolon pud niya ang Ginoo nga nagbuhat kaniya?
Sa pagsusi pag-ayo, kining isyu sa pagpakasala mahulog sa atong gahum sa pagpili. Kung sa English pa, tungod kini sa atong freedom of choice or free-will. Kining free-will mao’y nagahatag kanato og abilidad sa paghimo og mga desisyon o pagpili. Mao kini ang pinaka-korona sa atong pagkatawo.
Ang gahum sa pagpili mao’y makahatud kanato sa pagsunod o pagsupak sa sugo. Ang kondisyon sa Ginoo sa Iyang gingharian mao kini, kung magsunod sa Iyang mga sugo, magpabilin ka sa kinabuhing dayon. Kung magsupak pud ka, ngadto ka sa kamatayon.
Paunsa niabot ang topiko sa kamatayon sa gingharian sa Dios? Higala, ang uniberso mahimong organisado pinaagi sa mga balaod nga nagadumala niini. Bisan pa ang atong kinabuhi, ginadumala sa mga kasugoan. Aron nga mapadayon ang pagtuyok sa tanang butang niining uniberso o gingharian sa Dios, kinahanglan masunod ang mga balaod nga nagadumala niini. Mao kini ang naga-sustenir sa kinabuhi niining tibuok uniberso.
Kung kining mga balod pagasupakon, magabuak kini sa matagrelasyon sa mga binuhat, nga maghatud sa kamatayon. Mao nga ang bisan kinsa nga magsupak sa mga prinsipyo sa Dios magapadulong sa kamatayon. Mao na’y giplastar pag-ayo sa Dios ni Adan ug Eba sa panahaon nga gibuhat sila, ug si Lucifer sa wala pa siya nahulog sa tumang pagpakasala.
Busa, ang dungguanan niining pangutana anaa sa gahum sa pagpili. Ang kamatayon nisulod tungod sa pagpili og sayop, ug ang kinabuhi ma-sustenir tungod pud sa pagpili og matarung.
Atong pilion ang mga matarung nga desisyon matag-adlaw aron atong ma-sustenir ang kinabuhi. Sama ni Joshua, (Joshua 24:15) atong pilion ang Dios. Mao’y atong bidlisiw sa paglaum karon.