ADLAW’NG Dominggo, Marso 8, ang ikaduha ug katapusang adlaw sa gipahigayong Shoot to End Local Communist Armed Conflict (Stelcac) nga gi-organisa sa Davao City Police Office sa firing range sa Police Regional Office (PRO) Davao Region, Camp Sgt., Quintin M Merecido, Buhangin, Davao City.
Katuyoan sa maong aktibidad nga mapakusgan ang kampanya sa paghunong sa padayong local communist armed conflict sa mga dapit sa Davao City nga dunay presensiya sa New People’s Army (NPA).
Sumala ni Police Captain Rosario Aguilar, spokesperson sa DCPO nga human sa ilang mural painting sa gawas sa DCPO headquarters gisunod nila ang firing, kauban ang mga sakop sa media ug mga kadagkoan sa dose ka mga istasyon sa kapulisan sa Davao City.
“After sa mural painting nato, napakita nato didto ang kampanya sa pagpahunong gayod sa ilegal nga aktibidad sa mga local communist group, kining mga NPA, mabasa ug makita nila didto nga mas maayong mosurender sila sa gobyerno, so same ngari sa atong Stelcac,” suma ni Aguilar.
Ang maong aktibidad usa sa mga nakahan-ay nga programa ni DCPO acting director Police Colonel Kirby John Kraft. (Jeepy P. Compio)