NAGTINGKAGOL sa mini-cell sa Police Station 9 (PS9) sa Macasandig ang duha ka mga suspetsado human nasikop sa kapolisan sa drug bust niadtong Huwebes mga alas 2:45 sa hapon sa Camaman-an ning siyudad sa Cagayan de Oro.
Tumong sa tinugyanan sa kapolisan ang suspetsado nga si Abdul Capawa, 20, ulitawo nga taga Ramonal Village ning siyudad ug laing suspetsado ang nasikop sa dihang naaktohang nag-pot session nga naila nga si Danny Udasco, 57, minyo, ug lumulupyo sa Tiano/Yacapin ning siyudad.
Sa report sa kapolisan sa PS9, nasayran nga nagpahigayon og drug bust ang kapolisan sa pagpangulo ni Police Senior Inspector Ercison Enerio Sabanal, station commander, ug tumong niini ang suspetsado nga si Capawa sa maong operasiyon, hinungdan sa malampusong pagkasikop niini.
Giingong niadtong higayona, nasapon sa akto nga nagpot session sa maong panimalay nga gipanag-iyahan sa usa ka alyas Sarip si Udasco, hinungdan na usab nga lakip kini nga gisikop apan daling nakapalayo ang laing kauban niini sa dihang nabantayan ang presensiya sa kapolisan.
Gawas sa usa ka pakete sa gitoohang shabu, nakuha pa sa posisyion ni Capawa ang laing duha ka mga pakete sa gitoohang shabu samtang laing usa ka pakete ang nakitang nahabilin sa lamisa diin nagpahigayon og pot session si Udasco ug laing kauban.
Sa pagkakaron, kasamtangang nagtingkagol sa mini-cell sa PS9 ang maong mga suspetsado alang sa pagpaabot sa tukmang kaso nga ipahamtang batok kanila.