HUMAN sa duha ka tuig nga pagsuway sa pag-ugkat sa kabilin sa World War II sa lungsod sa Medellin, amihanang Sugbo, malampuson nga naugkat sa Philippine Army sa Sabado, Marso 7, 2020 ang tanke de giyera nga nalubong sa sapa sa Dagusungan.
Nakuha sa mga sakop sa 53rd Engineering Brigade sa Philippine Army ang WWII US Army M5A1 Stuart nga tanke.
Nangu sa operasyon, uban sa Bureau of Fire Protection, ug kapulisan, mao si Captain Czar Guitering.
Sa social media, Facebook, nakita ang mga hulagway sa operasyon sa grupo.
Matod ni Mayor Benjun Mondigo sa Medellin nga milanat og duha ka adlaw ang operasyon tungod kay naghuwat sila nga mohunas.
Sa 2018, una nga gisuwayan pagkuha sa Army ang tanke human sa research sa lungsod, apan napakyas lang kini.
“Pirmiro nangalubong man to ang mga backhoe nga gigamit didto, hapit man na mangadisgrasya ang ekipo didto. So, nag-strategize mi mao to nga amo ni gipamutangan og bolder ang kilid aron makaabot sa area”, matod ni Mondigo sa Superbalita Cebu sa Marso 7, 2020.
Ang tanke nga gipanag-iya sa mga Amerikano nisuway paglabang sa taytayan sa Dagusungan sa WWII, apan nalubong ang gisakyan sa grupo sa dihang gipaarakan sa mga Hapon. Sa nanglabay nga katuigan, naputos na sa lapok ug gipangtaya na kini.
Buot ni Mondigo nga kon asa nakuha ang tanke, magpabilin kini sa nahisgutan nga lugar.
“Ato ni nga gi declare nga heritage ni nga butang ang tanke. So, we are intending nga diha lang nato ibutang dapita aron naa gyuy historical value. So, our intention is para sad sa tourism and heritage promotion kay ang area diri sa Medellin daghan na gyud og istorya dinhi sa mga Hapon. So, karon this is a way of giving a testament ug education sa mga tawo nga naa gyuy nahitabo didto nga gira”, matod ni Mondigo.
Nakig-coordinate na ang lungsod sa Provincial Heritage Office aron mahatagan sila og giya ug dugang nga kaalam kabahin sa kabilin.
Gisusi karon sa lungsod ang uban pa nga posibilidad nga may laing kabilin pa nga mahimong maugkat sa lugar tungod sa panghitabo sa kaniadto.
Gilimpyohan na ang tanke, gisulod sa usa ka tent ug gi-cordon.
Malipayon si Mondigo tungod kay sa niining paagi, mas makaawhag kini sa mga turista nga mo bisita sa lugar tungod sa history sa lugar.
“Nalipay ta ani kay sa lungsod it will give a boost gyud sa tourism maong magpatabang sad gyud mi sa province unsaon ni pag handle.”