MOABOT sa 72 ka mga tawo nga gidudahang nanugal gidakop sa mga pulis nga sakop sa Regional Intelligence Division (RID) 7, City Intelligence Branch (CIB) sa Cebu City Police Office (CCPO) ug Carbon Police Station.
Ang gikatahapang mga sugarol naabtan sa mga pulis nga nanambong sa volleyball nga dayondayon nga dunay pusta sa usa ka bakanteng luna sa Barangay Ermita, Dakbayan sa Sugbo sa mga alas 3 sa Biyernes sa hapon, Marso 6, 2020.
Si Police Capt. Romeo Caacoy Jr. sa RID 7 maoy nangu sa pagronda nga niresulta sa pagkasikop sa 72 ka mga lalake nga mga lumolupyo sa nagkalaing-laing barangay sa Dakbayan sa Sugbo.
Si Caacoy nga nahinabi sa Superbalita Cebu niadtong Biyernes niingon nga ilang gironda ang dapit human sila makadawat og reklamo.
Sa ilang pag-abot, nagduwa og volleyball nga dayondayon.
Sukwahi sa naandang volleyball, dunay unom ka players ang matag team ug dunay referee.
Sa dayondayon, dunay tulo ka players ang matag team ug duna gihapoy referee, apan may nadugang na nga masyador ug mamustahay.
Matod ni Caacoy ang masyador maoy mopahibawo sa mga anaa sa palibot nga sugod na ang pagpamusta sa laing hugna sa duwa.
Siya ang motapok sa kwarta sa nagtaya hangtud nga kon pila ang naabot nga kwarta, magdepende na sa masyador kon ilarga ang duwa.
“Kaning volleyball, dili ilegal nga duwa, apan kon sagulan na og pusta, ilegal nga sugal na ang maong duwa,”pag tin-aw ni Caacoy.
Nasakmit ang bola, net score board ug ang kwarta nga pusta nga moabot og P27,000 nga nabawi gikan sa mga masyador.
Gilusad ang operasyon sa kapulisan nunot na sa mga reklamo sa pipila ka mga residente.
“Pila ka adlaw namong surveillance ni. Akong mga kauban mosulod unya miapil pud kunohay og pusta. Mora pud og mga mamustaay. Apil ni siya sa among surveillance nga gihimo hangtud nga mao nani karon nga nangadakpan na sila,” butyag ni Caacoy.
Ang mga dinakpan, dihang gipahibawo nga dakop, wala makasabot sa gibati nga mga pulis diay ang uban nga anaa sa palibot. Wa na sila kalihuk.
Si Alvin (di tinuod nga ngan), niingon nga wa na siya makasibat kay ang mga agianan dunay mga pulis.
Depensa ni Alvin nga igo lang siya nitan-aw ug nipusta og gamay.
“Sa tinuod, Sir, nipusta ko P100. Pero kadto ra kay paingon ko sa Pasil unta nga mokaon og tuslo buwa. Nya nadakpan man hinuon,” tug-an niya.
Ang mga pamilya sa mga nadakpan nagpanon sa pag-adto sa Camp Sergio Osmeña sa Osmeña blvd. tungod sa kabalaka dihang nakita sa Facebook live sa Superbalita Cebu.
Pasakaan sila og kasong illegal gambling.