HU-HU-HU! Ikaw gyud ang mabasol ini, Kevin! Waaaaa!” mingaab si Marisa samtang naglantaw sa balay nila nga nasunog. Nagkamuritsing siya sa singot, sip-on ug luha. Ang gitabang sa mga bumbero mao ang kasikbit nga mga balay. Maoy ilang gipasiritan og tubig ang mga balay nga wa pa masunog aron di katabok ngadto ang kayo.
Ning sayong buntag, adlawng Dominggo, si Marisa ang nahabilin sa ilang balay. Ang iyang Papa Lolong ug Mama Vina sayo nga nanimba.
Way nahipos si Marisa sa ilang mga butang. Tungod sa kakalit nga pagsilaob sa kayo unay ra sa lawas ang nadala niyang sinina. Way kalibutan ang iyang ginikanan sa hitabo kay tua pa sila sa simbahan. Bugtong siyang anak, busa ang iya rang kaugalingon ang iyang giluwas.
Lima ra ka balay ang kasikbit sa balay nilang Marisa. Nakapanghakot ang mga tagtungod sa ilang mga butang ug naluwas pod ang ilang mga balay, kay ang kayo milamoy ra man sa balay nilang Marisa. Hapit na mapawong ang kayo nga milamoy sa maong balay. Nagsige gihapon pagpasirit og tubig ang bumbero sa laing mga balay.
“Kinsa man nang Kevin nga gibasol nimo sa sunog? Nakadungog man ko ganiha sa pagsiyagit nimo,” matod ni Gloria, suod nga silingan ug kababata ni Marisa. Nagliundok daplin sa karsada ang ilang mga gamit nga gilikay sa sunog. Giduol niya si Marisa nga nagbarog daplin sa karsada ug gitunolan og labakara para itrapo sa nawong niini nga may itom nga mek-ap.
“Salamat,” ni Marisa nga midawat sa labakara ug nanarapo siya sa iyang nawong. Pagka human niyag trapo, gitunol niyag balik ang labakara kang Gloria.
“Imo na lang na. Kinsa lagi na si Kevin?” ni Gloria.
Mitutok si Marisa kang Gloria. Nagpanagana siyag tubag sa pangutana niini. Naglibog siya kon ibutyag ba niya nga ang iyang kalagot kang Kevin ang hinungdan sa sunog. Uyab niya si Kevin sud na sa lima ka tuig. Klasmeyt sila sa kurso nga Accountancy, gikan sa ‘first year’ hangtod na sa ilang pag-gradwar. Nagdungan silag kuha sa CPA board exams. Nahagbong siya. Si Kevin nakapasar. Sukad niadto wa na sila magkakita. Hilig si Kevin nga mosulat og mga ‘love letter’ kaniya. Nahibulong si Marisa ug nabalaka kay wa gyud siya imbitaha ni Kevin sa ‘oath taking’ niini isip CPA. Sukad nahimong CPA si Kevin di na kini motubag sa tawag o teks ni Marisa. Unya, wa na sab siyay nadawat nga sulat. Usa ka tuig na silang way komunikasyon.
Unya na-post sa Facebook nga gikasal si Kevin sa uyab niini sa Manila. Ang natigom ni Marisa nga mga ‘love letter’ ni Kevin miabot og usa ka sako. Sa iyang kalagot gidauban ni Marisa ang mga sulat ni Kevin sa ilang abuhan. Maoy hinungdan nga misilaob kini ug misunog sa ilang balay.
“Si Kevin uyab nako nga maluibon!” matod ni Marisa ngadtong Gloria. “Nangasawa og laing babaye! Hu-hu-hu! Waaaaaa!” Nakampat na sab ang iyang nawong sa luha ug singot.
Naluoy si Gloria kang Marisa. Gigakos niya kini ug gihapuhap ang bukobuko. Apan wa si Gloria makatuhog sa estorya.
“Gisunog ni Kevin inyong balay?” ni Gloria nga nahimalingka. Wa gyud siya kasabot kon unsay papel ni Kevin sa hitabo.
“Na-absent minded ko nga naglung-ag ganiha. Bisan unsa na lay akong gisugnod, maong nisilaob among abuhan. Waaaaaa!” miumbangol si Marisa. Dili siya makasulti sa tinuod, kay basig makaingon si Gloria, ‘Mirisi ka, Marisa!’ (Katapusan)