NAA nay mga bag-ong teknolohiya kabahin sa prevention nga nahisgutan diri sa usa ka conference sa mga political officers nga gipahigayon sa Subic. Apan ang mahinungdanon mao karon ang pagdeklarar sa Department of Health (DOH) nga Code Red na ang atong health emergency.
Gani, atong nadunggan nga deklarar na sab si Presidente Rodrigo Roa Duterte nga dunay health emergency ang Pilipinas.
Importante kini, alang kanako, kay mao kining ingon niini nga deklarasyon nga makapadali sa pag-release sa mga pundo sa kagamhanan batok sa Covid 19.
Di na mahimo kitang pagkumpyansa. Gawas sa health situation, nakaingon ko nga kini moresulta sa usa ka krisis sa ekonomiya.
Kini lang atong desisyon nga di pasudlon sa nasud ang mga Insek ug mga Koreano kalit nga nakapamingaw sa minilyon nga mga turista nga nia sa nasud matag adlaw.
Sa pagmingaw sa turismo, kalit nga walay negusyo ang mga tourism-oriented business ug mga supply chain sama sa mga supplier ug kining mga transportasyon nga nagsalig sa mga turista.
Karon, kon ang mga negusyo managhagba, unsa ang mahitabo sa mga mamumuo?
Gawas sa turismo, pipila na ka semana nga nawala ang mga barko nga napunog kargamento gikan mismo sa China. Buot ipasabot, nawala ang mga baratong supplies ug mga produkto nga makapuno sa atong mga department store, mga bodega, ug uban pa.
Hunahunaa ang krisis sa ekonomiya?
Alang kanako, mas importante nga maluwas dayon kita sa NCoV 19 ug sa Covid19. Di na kita mohulat nga modaghan pa ang mangasakit usa kita molihok.
Matod man gud sa pipila, di angay mo-panic dayon. Samtang, dili matarantar, di sab kita mokumpyansa.
Mahinungdanon niini mao ang magpakisayod. Dayon adto maminaw sa mga opisyal nga mga anunsyo. Daghan ra ba kaayo ang mga way buot nga magpataka na lang sa paghimog fake news. Malingaw sila nga mailad ang kadaghanan.
POLPhil
Hinuon, di lang ang kabahin sa Covid 19 ang nahisgutan sa grupong Political Officers League of the Philippines (POLPhil).
Nagkasabot ang grupo nga mosuporta lang og usa ka kandidato alang sa pagka presidente karong 2022. Apan wala pa modeklarar kinsa ang suportahan.
Sa pagkakaron, masabtan man sab nga wala pay kandidato nga modiga dayon samtang sayo pa. Nakat-on sila sa gibuhat ni kanhi bise presidente Jojo Binay. (@anol_cebu sa Twitter)