Na-quarantine ang ABL import nga si McKay

MALANGAN na sab ang pagduwa nila ni Justine Brownlee ug John Fields sa San Miguel Alab Pilipinas sa ASEAN Basketball League gumikan kay nakadesisyon ang liga nga ipang-uswag ang ilang mga duwa nga naka-eskedyul sa sunod semana.

Ang pagkauswag gianunsyo sa ABL human na-quarantine sa Singapore ang import sa Slingers nga si Jameel McKay gumikan sa coronavirus disease (Covid-19).

Si McKay gidakop sa Singapore immigration sa pagbalik sa Slingers gikan sa Malaysia gumikan kay naa siya sa listahan sa Singapore’s Case 113 tungod kay nasayran nga nakasakay siya sa biyahe gikan sa Istanbul paingon sa Singapore diin nasuta nga positibo sa Covid-19 ang usa sa mga pasahero niini.

Matod sa Ministry of Health sa Singapore, si McKay kasamtangang naka-quarantine ug obserbahan pa kini sa magsunod nga duha ka mga semana hasta ang tanang mga sakop sa Slingers.

Ang Kuala Lumpur Dragons ug league personnel nga posibleng nakahikap kang McKay bantayanan sab sa magsunod duha ka mga adlaw.

Sila si Brownlee ug Fields moduwa na unta sa Alab Pilipinas sa labing unang higayon kagahapon batok sa Singapore Slingers.

Wala pa masayri kon kanus-a mapahigayon ang sangka sa Alab Pilipinas ug Slingers.

Sa kasamtangan, padayong apil sila si Brownlee ug Fields sa praktis sa Alab Pilipinas.

Ang presensya nila ni Brownlee ug Fields gilaumang dako og matampo aron mabawi sa Alab Pilipinas ang resulta.

Dili ikalimod nga usa ka title contender ang Alab Pilipinas ning maong kompetisyon apan nagkinahanglan sila'g og igong suporta. (ESL)