SUPERBALITA CEBU

CVIRAA iuswag o di?

SA PAGGAWAS sa taho nga aduna na’y kompirmadong local transmission nga kaso ang coronavirus disease (Covid-19) kagahapon dinhi sa Pilipinas, ang mga atleta ug coaches adunay managlahing baruganan kon ipadayon ba o dili ang pagpahigayon sa Central Visayas Regional Athletic Association (Cviraa) Meet karong Marso 21-28 sa Dumaguete City.

Ang kompetisyon makatapok og linibo nga mga student-athlete, tournament managers, mga ginikanan ug mga tumatan-aw gikan sa 19 ka divisions sa Central Visayas.

Ang mga mopatigbabaw ning maong kompetisyon mao ang morepresentar sa Palarong Pambansa nga ipahigayon karong Abril o Mayo.

Sa interbyu sa Sun.Star Cebu, igsuong buhatan ning mantalaan, matod ni Cebu City Niños track coach Arvin Loberanis nga kinahanglang hatagan og prayoridad ang kaluwasan sa mga atleta.

Kon siya lang ang matuman, gusto ni Loberanis nga iuswag lang una ang pagpahigayon sa kompetisyon hangtod nga padayon pa ang hulga sa Covid-19.

Hinuon gipasabot ni Loberanis nga kon madayon gyud ang kompetisyon sa gikatakdang petsa, iyaha na lang pahimangnuan ang iyang mga atleta nga magmatngon kanunay sa paglimpyo sa lawas ug makigkita sa delegation nurses sa matag unya.

Ang Department of Health (DOH) mipasaka na sa alert system ngadto sa Code-Red sub-level 1 human miabot na sa unom ang kaso sa Covid-19 sa nasod.

Alang kang Cebu Province coach Mark Tapales Cantal, pabor siya nga ipadayon ang kompetisyon gumikan kay nakapahigayon na man sab sa ilang qualifying events ang ubang mga rehiyon. Hinuon gitataw ni Cantal nga nagdepende ra ang tanan kon unsa’y desisyon sa Central Office.

Sila si rookie athlete Dave Naveo ug Batang Pinoy nationals double gold medalist Gio Beguña parehong gusto nga ipadayon ang kompetisyon.

Hinuon gipasabot nila ni Naveo ug Baguña nga kon mauswag na sab ang kompetisyon, ilaha ra kining dawaton.

Si Mandaue City coach Francis Berizo nga ang ang labing mahinungdanon mao ang pagtuman kon unsa man gani mando sa kadagkuan sa matag delegasyon ug kinahanglang mangandam og insakto.

Sa laing hahin, si Senator Lawrence “Bong” Go nagkanayon nga iyang isugyot ngadto kang Presidente RodrigoDuterte nga ideklarar ang State of the National Public Emergency ning puntoha. (RSC, ESL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph