BAG-OHAY lang nakoronahan nga Miss Kuyamis 2020 si Isabel Teano nga garbo gikan sa lungsod sa Opol, Misamis Oriental ug gitakdang morepresentar sa national stage pinaagi sa pagsalmot sa gikatakdang Miss Philippines Earth 2020.
Gibutyag ni Teano nga labing unang higayon niya nga morepresentar sa national stage ug di mawala ang iyang gibati nga kakulba apan sa gihatag nga suporta sa Provincial Government sa pagpanguna ni Misamis Oriental Governor Bambi Emano daw nakahatag kini og kusog kaniya.
"First time gyud nako ni nga national pageant, kulba siya but then again, hearing Governor Bambi nga mainspire kaayo ko. As in kulba gyod siya kay first time nako pero pagpakadungog nako sa iyang mission gusto nako mas motabang modala og honor sa Misamis Oriental labina iyang pangandoy para sa atong tanan nga maila ang lalawigan," matud ni Teano.
Kung hisgutan ang preparasyon, iya na usab kining gipangandaman.
"Akong preparasyon physically, mentally and emotionally dapat i-prepare gyod ang tanan kay dili lang man na sa pag walk, dapat naa pod kay grace sa stage para makab-ot nimo ang crown and hopefully makab-ot nato," matud niini.
Bout sab niini ipanghambog ang iyang gidala nga lungsod nga mao ang Opol.
"Para sa akoa ang Opol, the longest beach line in Misamis Oriental and nakita nako nga naay potential ug kinahanglan lang siya og alaga gyod sa tao, ipokos kay nice, relaxing ug refreshing ug mao akong gusto i-highlight nga tourist destination ang beach sa Opol," matud niini.
Inpirasyon kaayo ni Teano ang dako nga suporta sa katawhan alang kaniya.
"Maka-overwhelmed kaayo kay makita pa lang nimo ang support sa mga tao ma-inspired naka nga molaban, ihatag ang tanan dili lang para sa imong kaugalingon pero para sa tibouk Misamisnon," matud ni Teano.
Dugang niini nga kalampusan alang kaniya kun karon pa daan suportahan na siya sa iyang kawsa isip usa ka Earth warrior sa nasud sa Pilipinas pinaagi sa Miss Philippines-Earth nga sa bulan sa Abril ang gitakdang koronasyon.