DILI igsapayan sa usa ka inahan nga mamahimong klasmeyt niini ang usa sa iyang mga anak kinsa kasamtangang nagtungha sa Grade 2 sa Sitio Camansi, F.S Catanico, Siyudad sa Cagayan de Oro.
Nasayran nga ang 30 anyos nga si Gina adunay lima ka mga anak diin ang usa niini iyang klasmeyt, samtang adunay usa anaa sa Grade 1, Grade 4 ug Grade 6.
Gikalipay niini ang pagtukod sa lokal nga kagamhanan sa siyudad sa pagpangulo ni Mayor Oscar Moreno og tunghaan ilabi na sa ilang dapit aron nga sila mahatagan sa kahigayonan nga makatungha.
Kahinumdoman nga niadtong Marso 5 hingpit na nga gitunol sa lokal nga kagamhanan sa dakbayan ang bag-ong tulo ka mga classroom ug duha ka andana nga building.
Gibutyag ni Gina nga nalipay siya kaayo tungod kay mahatagan na sa kahigayonan nga maka-eskwela ug pinaagi niini madugangan ang kahibalo ug dili na ma-ignorante ug dili na usab maka-menusan.
Gawas niana buot usab niini nga makatabang sa mga anak ug diha sa pagtungha kampante kini nga makatabang na sa mga assignment sa iyang mga anak.
Gidugang pa nga dako na kaayo nga kalipay tungod niini nga oportunidad alang kanila tungod kay duol na sa ilang dapit ug libre pa nga makatungha hinungdan nga gipahimuslan kini nga kahigayonan bisan pa man sa taas nga pangidaron ug anaa pa sa Grade 2.
"Duol na dayon libre pa gyud," matud ni Gina.
Giingong wala kini maka-eskwela kaniadto tungod kay kinahanglan pang magbaklay ang mga estudyante kaniadto og dili momenus 20 ka kilometro aron lang makaabot sa Malasag Elementary School sa Sitio Malasag sakop sa Barangay Cugman.
Sagad sa mga lumulupyo sa maong dapit wala mahatagi og kahigayonan nga maka-eskwela tungod sa kalisod ug gilay-on rason nga sagad kanila hangtod lang sa Grade 3.
Pursigedo usab kini nga makalampos sa iyang pagtungha bisan man lang sa elementarya.