DILI man hinuon tanang nasud sa kalibutan, pero, hinayhinay nga mikuyanap kining kagaw nga dali rang ikamatay sa tawo kung matakdan, kini ang coronavirus disease 2019 (Covid-19) nga naggikan sa Wuhan, probinsya sa Hubei sa China.
Sumala sa mga eksperto, dili daw mabuhi kining nahisgutang kagaw kung init ang maong dapit o lugar sama sa atong nasud nari sa Pilipinas, summer and rainy season o ting-init ug ting-ulan, pero, nganong ang nasud sa Iran nga kabahin sa Middle East gisulod man sa maong kagaw?
Karon, hinayhinay nang mikamang kining maong kagaw, sa mga nasud sa Europa, Africa, ug bisan pa sa Estados Unidos. Sa pagkakaron, ikaduha na ang South Korea sa China nga grabeng giigo niining maong sakit, iya nang nalampasan ang Japan nga maoy unang gitakdan ning maong kagaw.
Karon bag-o didto na usab sa Seattle, Washington District sa Columbia ang ubay-ubay na usab ang gipangtakdan ning ikamatay nga sakit, Disyembre 2019 pa nagsugod kining sakita sa China, ug matud pa hangtud lang daw ni ning bulan sa Marso o Abril, apan sumala pa ning bag-ong gibutyag sa Department of Health (DOH) basi'g hayan modagan pa kini og usa ka tuig.
Kaluoy sa Diyos, ngari sa Pilipinas wala kaayo ma-igo ning maong kagaw, puro lang Person Under Investigation (PUI) ug kung aduna may mga Pilipino nga nagpositibo kadtong nagtrabaho sa abroad, nga gipa-quarantine dayon inig abot nila sa atong nasud.
Matud pa’s akong amigong doktor kini ang gitawag og “gira sa mga kagaw” nga dili kita makasukol tungod kay dili man nato makita, maayo pa og gira sa pusil batok pusil kay makita man nato ang atong kaaway ug makasukol kita ug kung dili makaya mahimong molikay, apan kining maong kaaway dili mo makita, ug waka’y kalibutan nga anaa na sa imo ang ikamatay nga sakit.
Kini nga katalagman daw pahinumdom na sa Diyos sa katawhan dinhi sa kalibutan nga wala na mahinumdom kung kinsay tag-iya ning wanang nga kalibutan nga atong gipuy-an karon.
Ang mga namuno sa mga higanteng nasud walay katagbawan, dili kontento sa ilang nasud, mangilog pa og mga gagmay nga nasud nga kaya nilang daug-daugon tungod kay walay ikasukol.
Gihatag sa Diyos kining kalibutan alang sa tanang katawhan, pero adunay maghawod-hawod kung diin hangtud karon duna pa’y mga tawo ning kalibutan nga bisan gamay'ng luna lang nga tukoran sa ilang puloy-anan apan wala, gihikaw kanila sa mga impluwensiyadong mga tawo nga malakas sa gobyerno.
Apektado na ang ekonomiya sa ubang mga nasud nga gihugpaan niining sakita, kita dinhi sa Pilipinas tahado nang mokaon sa mga imported nga mga makaon gikan ubang nasud, tungod sa kabalaka kung adunay dala nga sakit ang ilang mga produkto. Kanus-a kaha kini matapos? Diyos lang ang nasayod, always pray to God nalang.