GIHANDOM sa kapolisan ang tulo ka tuig na nga pagkamatay sa upat ka mga pulis human gibanhigan sa mga rebeldeng New People’s Army (NPA) didto sa Barangay Sibayan, Bansalan Davao del Sur niadtong Marso 8, 2017.
Kahinumdoman nga miresponde niadtong higayona ang kapolisan sa lugar tungod sa usa ka sibilyan nga gipatay sa mga NPA.
Kagahapong adlawa, Dominggo, apil mihandom sa kamatayon ang mga pamilya nila Patrolman Rolly Benelayo, Joe Narvaza ug Saro Mangutara pulos sakop sa Bansalan Municipal Police Station ug Staff Sergeant Jayden May Rabor, miyembro sa Scene of the Crime Operatives (SOCO) sa siyudad sa Digos City.
Swerteng naluwas niadtong higayona si Staff Sergeant Allen Arnado.
Pinaagi sa simpleng programa nga gihimo sa kapolisan sa lugar ug Davao del Sur Police Provincial Office (DSPPO) aron ipakita nga wa gihapon nalimtan ang linuog nga krimeng gipaluyohan sa teroristang NPA.
Grupo sa committee front 51 ang gitudlong suspek sa brutal nga pagmapanhig.
Sa kasamtangan, gipakusgan na sa kapolisan ug militar ang kampanya batok sa mga walhong komunista pinaagi sa End Local Armed Terrorist Conflict (ELCAC). (Orlando B. Dinoy)