DUNAY duha ka mga person under investigation (PUI) sa coronavirus disease 2019 (Covid-19) sud sa Southern Philippines Medical Center (SPMC) sa Davao City.
Kini ang gikumperma ni SPMC Chief Dr. Leopoldo J. Vega atol sa ambush interview sa mga tigbalita niadtong Sabado, Marso 7.
"We have two person under investigation (PUI) here, so far iniingatan at binabantayan natin ang kanilang kalagayan," sulti ni Dr. Vega.
Ang mga nahisgutan anaa kini gi-isolate sa isolation room building human nakitaan og mga sintomas sa coronavirus.
Sayo niini, ang Philippine health authorities mibutang sa Code Red human sa laing kaso sa Covid-19 sa nasud nga anaa na sa unom.
Si Health Secretary Francisco Duque III mikomperma sab sa kaso sa local transmission sa 62-anyos nga lalaki kinsa dunay severe pneumonia ning kasamtangan.
Ang Code Red alert nagpasabot nga ang tanang personahe sa tanang ospital kinahanglan mo-report sa ilang duty.
Sa laing pakighinabi gibutyag sab ni Senador Christopher Lawrence 'Bong' Go nga mas maayong mohimo dayon og dugang aksyon nga mao karon ang gihimo sa gobyerno.
Dungan niini, ang DOH nagpagula og rekomendasyon sa Malakanyang nga madeklara ang State of Public Health Emergency ug giuyunan sab kini ni Presidente Rodrigo Duterte.
"The Office of the President also notes the recommendation of the DOH to declare a State of Public Health Emergency," pamahayag ni Chief Presidential Legal Counsel ug Presidential Spokesperson Salvador S. Panelo.
Dihang nadunggan ni Merlyn Alegado, 44-anyos taga Quezon Boulevard, Davao City ang maong mga impormasyon siya nabalaka sa mosunod nga kahimtang.
"Makabalaka kay basin pag-abot sa pipila ka bulan ma-parihas ta sa Italy, Japan ug South Korea nga gamay lang ang kaso, tapos midaghan. Hadlok kay basin mag-panic na unya ta," saysay ni Alegado sa Superbalita, kagahapon.
Gihangyo ni Senador Go nga di mag-panic ang publiko gumikan naningkamot ang gobyerno nga dili gyud makakatag ang Covid-19 sa nasud.