NA-ADMIT si Rafael sa ospital kay gipaubos siya sa proseso sa ‘apendectomy.’ Ania siya karon sa usa ka pribado nga lawak sa Sugbo Medical Hospital. Gi-tsek ap sa usa ka nars ang iyang kondisyon. Gitutokan niya ang nars, Maanyag kini ug nabatyagan niya nga daw may mga alibangbang nga nagkadaiya ang mga bulok nga nagpasunding alirong sa matahom nga panagway sa nars. Nabihag siya sa kaanyag sa nars.
“Miss?” misulti si Rafael nga nagpahiyom.
“Yes, Sir. Unsa man?” sa nars nga mitan-aw sa nawong ni Rafael; nagpahiyom sab. “Pwede mag-ila-ila ta?” ni Rafael.
“Why not? Ako si Sabrina,” tug-an sa nars, “Rina akong angga. 27 years old. Ayaw na lang ko tug-ani sa imo ngalan. Nabasa ko na man sa imong record. 32 imong edad and single. Raffy imong angga ug usa ka architect.”
“Okey. Pero ikaw, dalaga pa ka?” ni Rafael.
“Daga pa ko. Nagpaabot nga may madani sa akong pagka bulak!” salabtunon nga pulong ni Sabrina. “Wa pa nako ikahibalag ang lalake nga nakapapitik sa akong kasingkasing. Basig ikaw na. Raffy. Hihihi!” Pino nga inagik-ik sa nars.
“Siaw diay ka, Rina,” ni Rafael.
“O, sige, Raffy, biyaan sa tika kay may bisitahon pa kong ubang pasyente. Bye!” ni Sabrina nga migawas dayon sa lawak ni Rafael.
Duha ka semana ang pag-estar ni Rafael sa ospital. Sulod ning hamubong panahon nagkasuod sila si Sabrina. Nakakupot na gani si Rafael sa lumoy nga mga palad ni Sabrina, apan wa siya makapadayag sa gibati niyang gugma sa dalaga. Ug sa adlaw nga mi-check out na si Rafael nagbayloay silag numero sa selpon.
“Can I call or text a message to you, Rina?” ni Rafael.
“Of course! You’re a friend now. Pero pasensiyahe kon di ko ka-replay, kay basig dyuti ko anang orasa,” ni Rina
USA ka gabii wa mahikatulog dayon si Rafael. Nahinumdom siya kang Sabrina. Iyang gitawgan sa selpon. “Rina, dyuti ka?”
“Wa. Morning akong dyuti ugma, Why?”
“Duna koy isulti nimo nga angay ta nako isulti sa didto pa ko sa ospital.”
“Bahin sa unsa?”
“I’ll tell it now. Sabrina, I love you!” hupong sa katinuod ang mga pulong ni Rafael.
“W-What?” ni Sabrina nga nakugang. “Raffy, basig gigutom ka! Kaon, uy!”
“Wa ko magtiaw, Rina. Kon mahimo, magkita ta karon. Alas nuybe pa man sa gabii. Magkita ta sa Honey Bee sa Fuente. Okey?”
Nahimut-okan si Sabrina. Gibati sab baya siyag gugma kang Rafael didto sa ospital.
Naghinuktok siya makadiyot. Unya, gitubag niya si Rafael, “Okey, Raffy, magkita ta. Mag-ilis sa ko.” Gisul-ob niya ang itom nga skinny jeans ug pula nga T-shirt.
Didto sa Honey Bee nagsugod ang panagdikit sa mga pagbati ug mga kasingkasing nilang Rafael ug Sabrina. Paglabay sa mubong panahon gikasal sila sa Cebu Cathedral. Sa gabii sa ilang kasal may gitug-an si Sabrina kang Rafael human sa unang pagminahalay nila ibabaw sa kama. “Honey, di ko makahatag nimog liwat, apan lipayon ko ikaw!” ni Sabrina.
“Pero natagamtaman ko ang katam-is sa imong gugma!” ni Rafael.
“To tell the truth, I’m a transexual. Once I was a man with a woman’s heart and sex!”
“It’s okey. Kay di man ka kaanak, moadto ta sa DSWD. Magsagop tag bata!” ni Rafael. Gigakos niya si Sabrina nga hugot nga mibawos paggakos kaniya. (Katapusan)