ARON mahatagan ang mga kustomer og kasaligan nga updates sa coronavirus disease (Covid-19) ug status sa Bulkang Taal, ningtanyag ang Globe Telecom og libre nga data access sa mga website sa Department of Health (DOH), Philippine Institute of Volcanology and Seismology (Philvolcs) ug sa National Disaster Risk Reduction and Management Council (NDRRMC).
Gihimo kini sa Globe kay nabantayan niini nga daghan ang nanggawas nga dili insakto o sayop nga mga report kabahin sa sinugdanan, mga epekto ug tinuoray nga kahimtang kalabot sa Covid-19.
Samtang, managlahi usab ang ubang impormasyon sa estado sa Taal volcano ug ang naapektuhan nga mga siyudad ug mga barangay.
Ang sayop nga mga kasayuran nga nanggawas nakamugna og kalibog ug usahay kahadlok ngadto sa mga tawo.
Tungod niini, ang Globe nilihok pinaagi sa paghimo nga libre sa data access sa mga website sa DOH, Phivolcs ug NDRRMC ngadto sa mobile ug prepaid home WiFi customers niini.
“As a public service, we want to direct our customers to the proper sources of information about COVID-19 and Taal volcano status so that they won’t be misled by fake news which may only cause unwarranted fear. Hopefully, this will encourage them to visit the right websites and not rely on data that may not have been validated or recognized as true,” matod ni Yoly Crisanto, senior vice president for Corporate Communications sa Globe.
Bisan kon walay load, ma-access gihapon sa mga kustomer sa Globe Prepaid/TM ang tulo ka websites.
Mas mopaspas hinuon ang load sa maong websites kon dunay data plan o naka-promo, apan dili ibanan niini ang mobile data allowance.
Kinahanglan lang i-turn on sa mga kustomer sa Globe ang mobile data sa ilang smartphones’ ug seguraduon nga naka-connect kini sa Globe 4G o LTE network. Kini usab ang angay nga buhaton sa mga naggamit og Home Prepaid WiFi sa Globe. (PR)