USA ka regular employee sa Cebu City Government ang kompirmadong positibo sa paggamit sa gidiling drugas nga subay sa gipahigayon nga surprise random drug test sa City Office for Substance Abuse Prevention (Cosap) niadtong Disyembre 19 sa miaging tuig.
Ang City Legal Office (CLO) nipadala og suwat ngadto sa napositibo nga empleyado para iyang i-contest ang confirmatory test sulod sa 15 ka adlaw.
Kini isip tipik sa imbestigayon sa CLP pinangulohan ni Atty. Rey Gealon para sa pagpahamtang sa posibleng silot nga haom sa iyang salaod.
Apan si Jonah John Rodriguez, pangulo sa COSAP nagkanayon nga dili na i-contest sa maong kawani ang confirmatory test inay mo-take siya og Drug Dependency Examination nga pagadumalaon ni Dr. Ilya Tac-an sa City Health Department.
Dugang ni Rodriguez nga siya maoy ikatulo nga regular employee nga na-positive ug ang duha nipailawom na og 6 month outpatient drug rehabilitation nga nga way suweldo gawas lang kon aduna pa silay leave credits.
Sa kinatibuk-an, niabot na og 72 ka mga empleyado sa City Hall nga naglakip sa mga casual ug job order sukad niadtong Hulyo sa miaging tuig.
Si Rodriguez niingon nga magpadayon ang ilang pagpahigayon og surprise drugtest ngadto sa mga departamento sa City Hall aron mapapahawa ang mga tiggamitan og shabu. (PAC)