USA ka babayeng German national nanghasi sa prisohan sa Mandaue City Police Office (MCPO) human wa tagai og sigarilyo, Lunes, Marso 9,2020.
Giila ang babaye nga si Veronika Bagle Weisenberg, 69, nagpuyo sa Hotel Lylie, Ramos St. Cebu City.
Sigon ni Police Cpl. Framel Lambating, custodian sa detention facility sa MCPO, nga si Weisenberg niadtong Sabado, Marso 7, 2020, nibisita sa Centro Police Station aron mangayo og ayuda sa kapulisan tungod wa kini kaon ug mga sinina.
“Gipakaon ug gitagaan siya og sinina nya katong na at ease na siya sa station, nalipat na sila, mao to gihipos na diay niya ang cellphone,” matod ni Lambating
Ang gi-charge nga cellphone ni Manuel Del Rosario,42, helper sa station, nawala na dungan sa pagkahanaw ni Weisenberg. Daling nagukod ni Del Rosario si Weisenberg ug nasikop dayon.
Nakuha gikan kang Weisenberg ang cellphone ni Del Rosario, duha ka charger ug P500.
Gituohang nag-withdrawal syndrome si Weisenberg tungod kay mogamit kini og heroin hinungdan nga nanghasi.
“I kept telling her to keep calm. Nya giingnan naman nuon kog fuck you,” sigon ni Lambating.
Bisan og anaa siya sa detention facility, gipusasan kini tungod kay ang kaubang priso sa langyaw gipangbukbok ug pangbuboan og tubig samtang nangatulog.
Giluwaan sab ni Weisenberg ug sabligan og tubig si Lambating.
Dugang ni Lambating nga nibisita ang bana sa maong langyaw nga usa sab ka German national, apan igo rang niduaw aron mangayo sa pin code sa tanan niining ATM cards.
Gidala na ang langyaw sa Hall of Justice aron pasakaan og kaso sa pagpangawat.