MABALAKA ko ining pipila nga nagtuong media ra ang nagkutaw niining Coronavirus Disease ug nakapabalaka sa katawhan. Di baya fake news ang gipangbalita.
Di sab amaw ang atong kadagkuan sa kagamhanan labi na si Presidente Rodrigo Roa Duterte nga modeklarar og public health emergency kon inimbento lang kini sa media.
Basta sa pagkakaron, naa na sa Code Red Sub-Level 1 ang alert sa atong Department of Health (DOH).
Alang kanako, angay di mokumpyansa ang katawhan ug seryosohon ang sanitation sa kaugalingon, sa pamilya, ug sa opisina. Mosunod sab kita sa mga public announcement nga gikan sa DOH, CDC ug kining UN.
Kay daghan ang napul-an sa mga fake news sa social media, makasabot ko nga duna gyuy mga tawo nga di motuo.
Alang kanako, daghan sab ang mga amaw nga nagpatuyang lang sab sa fake news.
Apan, sa pagkakaron, sweto na unta kita unsay tuohan.
Importante karon ang kamatuoran. Kamatuoran aron makapanalipod kita sa atong kaugalingon, sa atong pamilya ug sa atong komunidad.
Kamatuoran aron kita makahibawo unsaon epektibong mosalmot sa gubat batok sa COVID 19.
Didto karong bag-o sa usa ka komperensya sa Subic ang mga 35 ka sakop sa Political Officers League of the Philippines (POLPhil).
Bisan pa man sa lain-laing bulok sa politika ug sa relihiyon, nagkauyon mi nga gikinahanglan ang hiniusang mga lakang batok sa COVID 19.
Ang maong sakit di moila og unsay atong politika. Di moila kon unsay relihiyon. Di moila sab kon ikaw Insek, Korean, taga Europe, Amerikano, o Pinoy.
Ang COVID 19 moataki og tawo, sa Englis pa human beings.
Sa pagkakaron, naa nay mga kaso sa Metro Manila. Mangandam ta dinhi sa Sugbo ug sa Visayas kay kada adlaw baya ang byahe gikan sa kaulohan padulong sa atua.
Angay nang molihok karon ang mga LGU.
Apan di molihok tungod lang sa publicity o tungod sa unsa makwarta. Angay nga science-based ang atong mga lakang.
Angay natong sabton usab nga kining maong health situation moresulta sab og ekonomikanhong krisis.
@anol_cebu sa Twitter