KAHADLOKAN. Mikuyanap na ang Corona virus (covid19) sa kalibutan, nga sa atong pagtuo nga adto ra ni nga virus sa China tungod kay didto nagsugod sa Wuhan City niadtong Disyembre 2019. Apan sa bag-o nga taho hapit tibuok kalibutan na ang naapektohan aning makamatay nga sakit. Gani, di katuohan nga ang Amerika mataptan sa virus.
Kagahapon, gitakda nga si Presidente Duterte mopakanaog og state of public health emergency agi og tubag sa rekomendasyon sa Department of Health tungod kay midaghan na ang naigo sa corona virus dinhi sa atong nasud. Matud pa sa taho kagahapon, miabot na sa 10 nga compirmado nga dunay corona virus.
Ang upat nga dunay covid19 nga nakadugang sa unom: 1) usa ka 38 anyos nga Taiwanese, nga wala makabiyahe sa gawas apan dunay kontak sa usa ka Taiwanese nga mibisita sa atong nasud apan didto na makumpirma sa Taiwan; 2) usa ka 32 anyos nga Filipino nga nakabiyahe sa Japan sulod sa miagi nga 14 ka adlaw; 3) Amerikano nga 86 anyos, nga dunay hypertension ug nakabiyahe sa America ingon man sa South Korea; ug, 4) usa ka 57 anyos nga Filipino nga wa makabiyahe sa gawas apan natakdan sa dunay virus.
Bisan tuod og morag uwahi na ang rekomendasyon sa DOH nga ipaubos ang atong nasud sa state of public health emergency kay gihuwat pa man sa DOH nga modaghan ang kaso sa mga tawo nga nataptan sa corona virus, apan maayo na lang bisan og nalangay kay sa wa gyud. Gani, mipakanaug na og code red ang DOH dihang namatud-an dunay napositibo sa covid19.
Ang atong mga opisyal, labina sa taga DOH, morag kumpiyansa kaayo tungod kay ang una nga biktima, nga namatay sa covid19 usa man ka intsik nga taga Wuhan city diin didto naggikan ang coronavirus ug niadtong higayona wala pay usa ka Filipino nga nataptan niini.
Ang gikatahapan ug gibalak-an sa kadaghanan mao ang kakuwang sa husto ug sakto nga impormasyon gikan sa atong kagamhanan, sama sa DOH, ingon man sa kakuwang sa pagpugong sa mga turista nga gikan sa China. Gani, nahimo pa nga dakong isyu ang sa dihang gidili ang pagpasulod sa mga intsik gikan sa China, Hong Kong ug Macau.
Tungod sa maayong relasyon ni Presidente Duterte ug ni China Pres. Xi Jinping nalangay ang pagmando nga dili na makasulod sa ato ang mga intsik nga gikan sa China, Hong Kong ug Macau. Gani, lakip na niini og ni bisan kinsa nga nakaadto sa China. Ang kadtong mga turista gikan sa Wuhan City maoy una nga nagdala sa Covid19 dinhi sa atong nasud.
•••
BAG-O. Niadtong Biyernes, Marso 6, pormal nga gitudlo si Army Col. Gerry Catindoy, nga kumander sa 53rd Philippine Army Engineering Brigade nga nagbase sa Camp Lapu-Lapu, Apas, Cebu city. Si Lt. Gen. Gilbert Gapay, Army Commanding General, mitambong sa turn over ceremony sulod sa 53rd Engineering Brigade compound.
Ang entero Visayas ubos sa kamandoan sa 53rd Engineering brigade. Si Colonel Catindoy, nga sa di madugay usa na ka heneral, usa ka enhinyero ug nagdako sa Tacloban city diin iyang nahuman ang engineering course sa Divine Word College.
Matud pa ni Colonel Catindoy, sa akong pakig-storya, nga bisan tuod og engineering brigade sila apan motabang sila sa kumbate kon gikinahanglan ang ilang panabang.
Congratulations General Catindoy!