DAVAO DE ORO -- Gitabunan man sa kangitngit ang kahayag nga nagdan-ag sa panan-aw apan ang kasingkasing maoy nagsilbing giya aron mapalgan ang dalan paingon sa babayeng matuod nga gimahal ug gihigugma.
Si Rudy Sad-og , 48, usa ka buta, nagbutyag dihang personal nga nahinabi sa SunStar SuperBalita nga nagdako siya sa probinsiya sa Agusan del Sur apan nahiabot sa Montevista human nahibalag ug nakaila ang babayeng bugtong nakapapitik sa iyang kasingkasing nga mao ang biyuda nga karon nahimo niyang asawa nga si Arlyn, 56.
Sumala ni Rudy nga 36 anyos pa kaniadto si Arlyn dihang namatay ang unang lalaki nga gipakaslan gumikan sa sakit ug gibilin kaniya ang pito ka mga anak kon diin ang kamanghuran nag-edad pa intawon og usa ka tuig.
Sumala pa nga nagkaila silang Rudy ug Arlyn pinaagi sa usa ka higala sa buta ug sa unang higayon nga sila nagkahimamat, nabatyagan na sa matag-usa ang daw nag-ulbo-ulbong pagbati nga giingong di matuki nga mao ang gugma.
Wa man tuod makita ni Rudy kaanyag sa babayeng gimahal apan sumala pa niya nga ang iyang kasingkasing maoy nagsugilon sa iyang huna-huna kung unsa kaanyag ang babaye, labaw sa tanang binuhat.
Matud pa nga ang dakong kaluoy nga gibati kaniadto ngadto kang Arlyn maoy usa sa mga hinungdan nga gipakaslan sa buta ang biyuda nga adunay pito ka mga anak sa unang bana.
Si Rudy matud pa ang nagpadako sa mga anak ni Arlyn pinaagi sa iyang paningkamot sa pagsuroy–suroy sa nagkadaiyang dapit, kauban mismo si Arlyn, nga maoy nagsilbing giya, bitbit ang music box nga adunay micropone nga iyang gamiton sa pagkanta dungan sa pagpangayo og hinabang pinansiyal sa mga tawo.
Gisulti ni Rudy nga mokita sila sa iyang asawa og di moubos sa P600 matag adlaw ug usahay moabot pa og usa ka libo ka pesos.
Nagpasalamat sila og dako sa katawhan nga naluoy kanila sanglit ang maong salapi maoy ilang gigamit sa matag-adlaw nilang panginahanglan sa panimalay.
Dugang gibutyag ni Rudy nga wa na siya maglaum nga makakita pa pag-usab human nawad-an og panan-aw niadtong nag-edad pa siya og 6-anyos dihang nagkasakit siya og tipdas sanglit napakyas siyang makakita sa nag-edad pa siya og 15-anyos sa dihang gi-operahan ang iyang mga mata pinaagi sa tabang ni kanhi Presidente Fidel V. Ramos kay wa kini magmalampuson.
Hinuon gisulti niini nga malipayon siya sa kasamtangang kinabuhi, kauban ang babayeng gihigugma ug gipakaslan. Malaumon siya nga mag-uban sila hangtud sa katapusan sa ilang kinabuhi.
Samtang sa bahin ni Arlyn, mapasalamaton siya nga si Rudy ang nahimo niyang kapikas sa kinabuhi, luyo sa kapansanan sa mga mata sa lalaki, sanglit alang kaniya ang iyang bana mao ang superhero sa iyang kinabuhi gumikan kung di pa tungod niya, dili mapadako sa maayong pag-amuma ang pito ka mga anak nga karon aduna na’y tagsa-tagsa ka mga pamilya.