WALA pay abiso kalabot na sa pagkansela sa mga kalihokan dinhi sa dakbayan sa Cagayan de Oro apan hugot ang pagmonitor sa lokal nga kagamhanan sa siyudad batok Coronavirus disease (Covid-2019).
Gibutyag ni Teodoro Sabugaa, city administrator sa siyudad, nga dili buot ni Mayor Oscar Moreno nga dili magpahigayon og pagpakayab sa nasudnong bandila ug pagdili usab sa mga kalihokan.
Gidugang pa nga duha ka mga thermal scanner ang gipalit usab sa dakbayan alang sa mga dagkong kalihokan kung duna man dinhi sa dakbayan.
“Daghan man lage nag-istorya nga di na mag flag raising kay tungod niini, si Mayor Moreno di man sab sugot nga ingon ana dayon diretso, ato lang we have to put special nga mga measures, usa na niini kanang temperature scanner,” matud ni Sabuga-a.
Gidugang pa nga wala pa’y abiso sa pagkanselar sa mga dagkong kalihokan apan nag-abiso sa katawhan nga magpakabana ug makigkooperar sa gobyerno. Naghangyo usab nga tumanon ang mga abiso sa Department of Health).
Giingong kung kaniadto kung dunay mangayo og permit sa mga kalihokan ang pulis ug RTA ang magsusi niini apan karong panahona lakip na ang city health.
“Well so far wala paman sab, karon nadugangan na gawas sa RTA, pulis, city health office, Sila na sab dayon mag evaluate para pag-adto tawagon man sa city health ang organizer, istoryahan unsay maayo buhaton,” dugang pa ni Sabuga-a.