ANAA sa 60 ka mga thermometer scanner ang gipalit sa siyudad sa Cagayan de Oro aron nga ma-monitor ang katawhan sa dakbayan batok coronavirus disease (Covid-2019) nga nia na sa nasud.
Kini human nagdeklara na ang Department of Health (DOH) og Code Red labi na nga duna nay nahitabong local transmission o duna nay nataptan nga dili langyaw.
Gibutyag ni Teodoro Sabuga-a, city administrator sa siyudad, nga dunay napulo ka thermometer scanner sa city hall ug gitakdang laing 50 alang sa ubang lokal nga buhatan sa siyudad sama sa City Health, City Engineering ug uban pa.
“Well initially ang naay available karon napulo, ug naa pa ta’y mga 50 man siguro nga moabot,” matud ni Sabugaa.
Gidugang pa nga tumong niini nga tanang buhatan sa lokal nga kagamhanan sa siyudad mabutangan gyud niini aron nga daling mamonitor kung duna may naghambing og mga sakit nga susama sa sintomas sa Covid-19 aron nga dili na kini mokaylap pa.
“Because ang tuyo nato dinhi ang tanan nga mga offices outside city hall, engineering, city health kay naa gyud na i-temperature scanner,” dugang pa.
Gibutyag usab niini nga dunay gipalit nga duha ka mga thermal scanner alang sa mga dagkong kalihokan kung duna man.