PATAY ang usa ka suspetsadong drug pusher human nisukol sa kapulisan sa anti-illegal drug operation sa Tacloban City, alas 7:45 sa gabie, Lunes, Marso 9, 2020.
Ang operasyon gilusad batok sa suspek nga si Annfernie Olano, 19, taga Guadalupe, Cebu City, ug usa ka high-value target sa Police Regional Office (PRO)-Eastern Visayas.
Ang mga sakop sa Regional Drug Enforcement Unit (RDEU)-Eastern Visayas uban sa Tacloban City Drug Enforcement Unit (CDEU) ang nagtinabangay sa operasyon.
Usa ka poseur buyer ang mipalit og shabu sa suspek sa kantidad nga P22,000 diin ang P500 lang niini ang tinuod ug gihimo nga marked money apan ang uban salapi dili na tinuod.
Napalitan sa buyer ang suspek ug sa dihang nagpositibo ang transaksyon, mi senyas ang buyer sa mga operatiba, hinungdan nga miduol na ang mga operatiba.
Nakabantay ang suspek sa mga pulis ug nibunot sa iyang armas ug namusil, nihimo pag bawos ang mga pulis ug napatay ang suspek.
Narekober sa crime scene ang usa ka kalibre .45 nga pistola, magazine ug mga bala, 19 ka pakete sa shabu nga dunay market value nga P800,000, digital nga timbangan, sling bag ug school I.D.
Gidala na sa usa ka punerarya ang patayng lawas sa suspek samtang naa na sa kustodiya sa crime laboratory ang mga nakuha nga ebidensya. (JKDP)