GIUSWAG sa Philippine National Police Academy Alumni Association Incorporated ang ilang tinuig nga homecoming karong tuiga tungod sa corona virus disease (COVID-19) nga mitakod na sa 33 ka mga Pilipino.
Matod ni Police Colonel Roderick Mariano, national vice president sa alumni association ug kasamtangan nga Board of Trustees nga aron malikayan ang kontaminasyon sa virus, dii lang una himuon ang tradisyonal nga homecoming.
Ugmang adlawa, Huwebes Marso 11, ipahigayon ang parade sa mga pulis nga nigradwar sa Philippine National Police Academy sa Silang Cavite.
Gani, daghan na nga taga Sugbo nga unang nibiyahe paingun sa kaulohan ang nag-una, apan sa dihang gipahibawo niadtong Lunes sa gabii nga di lang una ihinayon ang homecoming, namauli sila gahapon.
Gisanong usab nila ang direktiba sa Department of Health ug ang pamahayag ni President Rodrigo Duterte nga likayan lang una sa pagkakaron ang mga pana tapok aron di mokatap sa Covid 19.
“It is precautionary measure because of the pronouncement of the President na state of emergency. So, doon na nag base ang aming decision to postpone in a later date yung ano,” matod ni Mariano.
Apan gibutyag ni Mariano nga magpadayon ang outreach program sa alumni association sa Batangas nga naapektohan sa pagbuto sa bulkang Taal nga nakaapekto sa tanang mga lumolupyo. Aduna silay giandam nga hinabang gikan sa mga pulis nga makatabang sa mga residente nga grabeng naapektohan sa pagbuto sa bulkan. (AYB)