LUWAS na sa makuyawng kahimtang ang labing sinaligan sa Bibbo Hotdog/Cebu Institute of Technology (CIT) Wild Kittens nga si Mark Jayven Tallo gikan sa usa ka makuyaw nga insidente.
Si Tallo nawad-an sa iyang panimuot dihang napantok ang iyang tulo sa sayong bahin sa 4th quarter niadtong Sabado sa 86-71 nga kapildihan sa Wild Kittens batok sa PTT Fuel/University of the Visayas (UV) Green Lancers sa Game 1 sa ilang semi-finals series sa 2010 Partner’s Cup juniors division.
Niadtong duwaa, adunay gamayng hilanat si Tallo apan giklaro sa iyang amahan nga si Mark Anthony Tallo dili kini maoy hinungdan nga nakuyapan ang iyang anak.
“Nasapid man gud to ang iyang tiil unya nabunal ang iyang ulo sa sawog mao tong nakuyapan siya. Kay kon hilanat, madaladala ra man na,” pasabot sa amahan sa Cesafi MVP ug JR NBA MVP.
Gipasabot sa amahan nga Tallo nga malipayon gyud kaayo siya nga negatibo ang resulta sa CT Scan nga gihimo sa Chong Hua Hospital alang sa iyang anak.
Sa laing bahin, hingpit nang nanamilit ang Wild Kittens human sila giusban pagbuntog sa Baby Green Lancers, 85-94, kagahapon sa Game 2 sa ilang semi-finals series.
Sa laing duwa, nakatabla ang Ave Maria Sanctuary Park/University of San Jose Recoletos (USJ-R) Baby Jaguars human nila gibawsan ang Enervon C/University of Cebu (UC) Baby Webmasters, 86-83, sa Game 2.