STATE of calamity pagbatok sa coronavirus disease (Covid-19) ang gideklarar sa Misamis Oriental Provincial Board niadtong adlawng Lunes, March 9.
Kini ang gikumpirma ni Sangguniang Panlalawigan Board Member Gerardo Sabal ug miingon nga gipasar na ang resolusyon niini aron ang pundo andam na daan kung ugaling aduna gyod emerhensya.
Dugang ni Sabal nga ang ilang pagdeklarar abiso sab ni Misamis Oriental Governor Bambi Emano kanila nga modeklarar na agi og pagpangandam batok niining makapatay nga virus.
"Atong pagdeklarar usa ka pro active approach. Dili na kinahanglan nato hulatan nga mokuyanap pa kini usa kita modeklarar ug kini atong gihimo pagpangandam nga kung panahon sa emerhensya andam atong pundo," matud ni Sabal sa Superbalita Cagayan de Oro ug miingon nga importante ang deklarasyon aron daan na makapangandam ang lalawigan.
Tanan nga mga local government unit sa lalawigan ang giabisohan na usab kalabot niini pinaagi sa Provincial Health Office.
Una na mideklarar si Presidente Rodrigo Duterte og State of Public Health Emergency human karon panahona misaka na sa 24 ang ihap sa nataptan.
Sa Kapitolyo probinsyal gibutyag ni Assistant Provincial Administrator Carol Lim nga nag purchase na sila og daghang alcohol aron mabutangan ang biometrics area, entrance ug exut nga bahin.
Modugang sab sila og palit sa thermal scanners alang sa uban departamento.
Una na naghatag ang probinsya og thermal scanner og thermal guns ngadto sa seaports ug airports sa lalawigan ug anaa na usab thermal scanners ang walo ka mga Provincial hospital sa lalawigan.
Dugang ni Caidic nga tun-an pa karon ni Emano kung kanselado ba ang tanan kalihokan sa probinsya sama sa flag raising ug uban pa nga kalihokan sa lalawigan human nakadawat og advisory gikan sa Davao City nga wala nay kalihokan lakip mga school activities sa maong siyudad.