NAKASULOD na gyod.
Ang gikaintapan nga Covid-19 nakasulod na gyod sa atong nataran og padayon kini sa pagsabwag og kadaot sa mga katawhan.
Sa mga nanglabay nga mga adlaw, nindot kaayo paminawon ang pamahayag sa atong mga kadagkoan sa DOH nga andam ang atong kagamhanan sa maong sakit.
Unsang klase nga pagpangandam ang ilang gibuhat?
•••
Daghan ang paagi nga motakboy ang maong sakit.
Kon ang usa ka tawo nga dunay Covid-19, moubo o kaha mohatsing unya tabonan sa iyang kamot, unya mohikap sa kwarta dayon gamit sa maong kwarta pagpalit o kaha pag-plete, dimalas gyod ang makahikap sa maong kwarta.
Kon ang maong tawo mohikap sa mga door knob o hand rail o kaha ang pasamano sa hagdanan, demalas sab ang makasunod og hikap sa maong door knob, hand rail o pasamano.
Susama ang mahitabo kon mogamit sa credit card ang maong tawo sa bisan unsang transaksiyon. Demalas sab ang sunod nga makagunit sa maong credit card.
Bisan pa kon nagtaptap sa iyang baba ang mosunod nga mohikap sa maong kwarta o credit card.
•••
Unsa nga pagpangandam ang atong gihimo?
Sa pagka-karon, wala nay mapalit nga N-95 nga face mask. Bisan asa nga tindahan, wala nay nagbaligya niini.
Bisan gani kadtong disposable nga face mask, nagnihit sab.
Buot ipasabot, dili kita andam.
Unsa nga pagpangandam ang gihimo sa mga hospital?
Du naba silay giandam nga “isolated hallways, passageways og isolated rooms nga para sa Covid-19 lamang?
Duna ba silay giandam nga mga tambal alang sa takboyan sa maong sakit?
Duna ba silay hustong gidaghanon sa mga doktor nga mosagobang sa maong sakit?
Duna na ba silay giandam nga quarantine protocol alang sa Covid-19?
•••
Tungod sa ka delikado sa maong sakit, wala pay nakita nga tambal niini bisan pa sa kadugay na nga panahon nga nagsuroy-suroy kining maong virus.
Kon tinuod kini, nagpasabot ba nga hulaton na lang nga mamatay ang maong gitakboyan sa sakit?
Susmariosep.
•••
Gi-suspende na ang klase sa mga eskuylahan sa Metro Manila. Giawhag ang mga kabataan sa pagpuyo na lang sa ilang kabalayan og likayan ang pag-gawas niini.
Lock-down ang tawag niini.
Unsa kadugay ang maong lock-down?
Sa Metro Manila, walay klase gikan sa Martes ngadto sa Sabado.
Bisan ang mga malls, mingaw kay nagnihit sa mga tawo nga mangadto niini.
Unsa kadugay kini?
Walay mamalit, walay halin, unsay mahitabo sa negosyo, sa mga trabahante?