WALA’Y giusik nga panahon ang Sugbuanong sharpshooter nga si Roygbiv “Roy” Barro isip bag-ong miyembro sa Laguna Practical Shooters Group (LAG-PSG) ug mihimo dayon kini’g kanaas pinaagi sa paglangkat sa kampiyunato sa junior category ug 5th overall sa standard division sa 3rd SND Delfin N. Lorenzana Cup nga gipahigayon niadtong weekend sa TPSAI Firing Range sa T’boli, South Cotabato.
Ang 3rd SND Delfin N. Lorenzana Cup usa ka Level 3 competition nga World Shoot Qualifiers.
Kahinumdoman nga sa Sedric Cup 2020, usa ka Level II event nga gipahigayon sa MMPSA Firing Range sa Plaridel, Bulacan sa miaging semana, si Barro igo ra’ng misakmit sa ikaduhang dapit sa junior class ug ikalima sa standard category.
Apan sa 3rd SND Delfin N. Lorenzana Cup, tatawng milambo ang abilidad ni Barro hinungdan nga nakaangkon siya sa grabeng pagdayeg gikan mismo ni LAG-PSG President Grand Master Alfredo “Jun Catz” Catalan Jr.
Gipasabot ni Catalan nga ang paglambo sa abilidad ni Barro nagsilbeng bunga sa advance training sa LAG-PSG.
Nagkanayon si Catalan nga daghang dekalidad ug beteranong nga shooters ang gipanglupig ni Barro.
“He beat a lot of shooters who are already decades into this sport. Imagine what will he achieve months or year from now. This kid is very exciting. He is a fast learner,” pamahayag ni Catalan.
Si Barro, 20, kinsa nahatagan og special citation sa miaging 37th Sportswriters Association of Cebu-San Miguel Brewery All-Cebu Sports Awards, nagpasalamat og dako sa LAG-PSG.
Gipasabot ni Barro nga kuntento siya sa iyang nakab-ot nga kalampusan apan alang kaniya, kinahanglan pa siyang mag-ensayo og maayo aron mas mabaid pa ang iyang abilidad.
Tungod sa iyang dalaygong gipakita sa South Cotabato event, dako ang kahigayunan ni Barro nga mahilakip siya sa Team Philippines nga mosalmot sa IPSC Word Shoot XIX nga gikatakda karong Nobiembre 28 hangtod Disiyembre 5 sa Pattaya, Thailand.
Apan sa dili pa siya maghunahuna niini, kinahanglang tutokan una ni Barro ang sunod nga kompetisyon nga iyang salmutan.
Kini mao ang National Range Officers Institute (NROI) Championship PPS Level 3 world qualifier match nga ipahigayon sa Lipa City, Batangas karong Marso 26-29, 2020. (ESL)