GIKAN sa tulo, nahimong unom ang mga anak sa magtiayong Arnold ug Rowena Arita sa Sitio Sto Niño, Barangay Catarman, Lilo-an. Kini human ihimugso ni Rowena ang triplets niadtong Marso 1. Lisod man tuod ang ilang kahimtang apan malipayong gihangop sa magtiayon ang pag-abot sa tulo ka mga bata sa ilang kinabuhi.
Si Arnold nangayo og motorsiklo diha sa ilang tugkaran isip nag-unang tinubdan sa panginabuhi. Si Rowena contractual worker sa usa ka pabrika, ug naundang og sayo sa iyang panarbaho sa dihang nagsabak siya sa triplets. Ako nga personal nga niduaw sa ilang balay nakasaksi kong unsa ka lisod sa ilang pagkabutang.
LAHUTAY
Unang pangutana nga akong nabati gikan sa mga tawo nga nakasaksi sa ilang pag gawas sa tambalanan niadtong Marso 10, makalahutay kaha ang pamilyang Arita pagbuhi sa triplets.
Si Nonoy Mongaya ang kanunayng matinabangon nga staff sa Vicente Sotto Memorial Medical Center diin gihimugso ang triplets maoy unang nangita og paagi unsaon nga di mabug-atan ang magtiayon sa ilang obligasyon sa tambalanan.
Si Nonoy nidangop sa buhatan ni Kongresista Red Durano og nabayran ang subra sa P4 mil nga balanse og pinaagi sa among news team nahimong sayon ang ilang pagpauli nila sa Catarman. Naikog man gani ko kay nagsinardinas ra mi sud sa sakyanan.
Salamat diay kang Mam Jekjek Fernandez sa buhatan ni Cong. Durano sa sayo namong pagbiya sa tambalanan. Si Mam Aracelli Navarroa ang nurse supervisor sa Pedia Ward gusto sab nakong pasalamatan tungod sa iyang kinasingkasing nga pagpakabana sa triplets. Ug sa pamilya ni Arnold ug Rowena sa ilang pagpaambit sa talagsaong gugma ngadto sa tulo ka anghel.
TABANG
Tungod sa ilang kahimtang, di nako malikayan ang paghunahuna kon di ba maapektahan ang panglawas sa triplets. Pananglit sa pag pasusu pa lang daan lisod na kaayo ni alang kang Rowena. Di sayon, og di sab mahimo nga ang tulo gyud ang iyang pasusuhon. Busa nagkinahanglan siya og tabang pinansyal aron makapalit og gatas aron ipuno sa iyang kaugalingong gatas. Kini wa pay labot sa mga vitamins nga gikinahanglan.
Mao nga nagpakatakos ako pagpanuktok sa taga kapitolyo nga maoy akong gituhoan nga dako kaayo og matabang sa triplets. Salamat nga wako pakyasa sa akong higala Mam Marivic Garces ang pangulo sa Department of Social Welfare and Services sa probinsya. Iyang gipasalig nga kutob saiyang mahimo ang kapitolyo motunol sa tanang kinahanglanon sa triplets aron sila magpabiling baskog.
Samtang nakadawat sab ko og pasalig gikan mismo sa Regional Office sa DSWD nga pangitaan nila og paagi nga moarang-arang ang panginabuhi ni Arnold.